މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ބެލުމުގެ ދަށުގައިވާ ޤައިދީންނާއި ބަންދު މީހުންގެ ތެރެއިން މާލީގޮތުން ދަތި ޙާލުގައި ދިރިއުޅޭ 10 އާއިލާއަކަށް އެހީތެރިކަން ފޯރުކޮށްދީފައިވާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން މަޢުލޫމާތު ދެއްވައިފިއެވެ.

މި އެހީތެރިކަމަކީ ރަމަޟާން މަހާ ގުޅުވައިގެން އެމްސީއެސްގެ އޮފިސަރުންނާއި މުވައްޒަފުން އިސްނަގައިގެން ކުރިއަށް ގެންދިޔަ ޕްރޮގްރާމެއްގެ ދަށުން ފޯރުކޮށްދެވުނު އެހީއެކެވެ. މި ޕްރޮގްރާމުގެ މަޤްޞަދަކީ ޖަލުގައި ތިބޭ ޤައިދީންނާއި ބަންދު މީހުންގެ އާއިލާތަކުގެ ތެރެއިން މާލީގޮތުން ދަތި ޙާލުގައި އުޅޭ ފަރާތްތަކަށް އެހީތެރިވުމެވެ.

އެމްސީއެސްއިން މަޢުލޫމާތު ދެއްވިގޮތުގައި، މި ޕްރޮގްރާމުގެ ދަށުން ކޮންމެ އާއިލާއަކަށް 2,220 (ދެހާސް ދުއިސައްތަ ވިހި) ރުފިޔާގެ އެހީ ފޯރުކޮށްދެވިފައިވެއެވެ. އަދި މުޅި ޕްރޮގްރާމުގެ އަމާޒަކީ 40 އާއިލާއަކަށް އެހީތެރިކަން ފޯރުކޮށްދިނުން ކަމުގައިވީ ނަމަވެސް، އެކަމަށް އެދި ހުށަހަޅާފައިވަނީ 21 ފަރާތުން ކަމަށާއި، އޭގެ ތެރެއިން ޝަރުޠު ހަމަވެފައިވަނީ 10 އާއިލާއެއް ކަމަށް އެމްސީއެސްއިން ވިދާޅުވިއެވެ.

މި ޕްރޮގްރާމުގައި ބައިވެރިވުމަށް ކަނޑައެޅިފައިވާ ޝަރުޠުތަކުގެ ތެރޭގައި ޖަލުގައި ޙުކުމް ތަންފީޛުކުރަމުންދާތާ މަދުވެގެން 5 އަހަރު ވެފައިވުމާއި، 18 އަހަރުން ދަށުގެ ދަރިން ތިބުމާއި، އަދި އާމްދަނީ ލިބޭ މިންވަރު ހިމެނެއެވެ.