ކުރިއަށް އޮތް 24 ގަޑިއިރު ރާއްޖޭގެ ގިނަ ސަރަޙައްދުތަކަށް މޫސުން ގޯސްވުމުގެ އިންޒާރު ދެވިފައިވެއެވެ. މި މުއްދަތުގައި ޚާއްޞަކޮށް ދެކުނާއި މެދުރާއްޖެތެރޭގެ އަތޮޅުތަކަށް ވިއްސާރަވެ، ގުގުރުމާއެކު ބޯކޮށް ވާރޭވެހުމުގެ ފުރުޞަތު އޮތްކަމަށް ބެލެވެއެވެ.
މޫސުމުގެ ނާޒުކު ޙާލަތާ ގުޅިގެން:
• ފުވައްމުލަކު ސިޓީއިން އައްޑޫ ސިޓީއާ ހަމައަށް ހުދު ސަމާލުކަމުގެ ނިޝާން ދެވިފައިވަނީ މިއަދު ހެނދުނު 05:30 އިން 10:30 އަށެވެ.
• ކ. އަތޮޅުން ގދ. އަތޮޅާ ހަމައަށް ހުދު ސަމާލުކަމުގެ ނިޝާން ދެވިފައިވަނީ ހެނދުނު 09:45 އިން މެންދުރުފަހު 15:30 އަށެވެ.
ވައިގެ ޙާލަތު:
• އުތުރާއި މެދުރާއްޖެތެރޭގެ އަތޮޅުތަކަށް ހުޅަނގާއި ހުޅަނގު އުތުރުން ވައިޖެހޭނެކަމަށް ލަފާކުރެވެއެވެ.
• ދެކުނުގެ އަތޮޅުތަކަށް ހުޅަނގު ދެކުނާއި ހުޅަނގުން ވައިޖެހޭނެކަމަށް ބެލެވެއެވެ.
• ވައިގެ ބާރުމިން ގަޑިއަކު 10 މޭލާއި 20 މޭލާ ދެމެދުގައި ހުރުމަށް ލަފާކުރެވޭއިރު، ވިއްސާރައިގެ ވިލާގަނޑުގައި ގަޑިއަކު 35 މޭލަށް ވައި ގަދަވެދާނެކަމަށް ބެލެވެއެވެ.
ކަނޑުގެ ޙާލަތު:
• ކަނޑުތައް އާންމު މިންވަރަށްވުރެ ގަދަވެފައި، ވިއްސާރައިގެ ވިލާގަނޑުގައި އިތުރަށް ގަދަވުމުގެ ފުރުޞަތު އޮތްކަމަށް ފާހަގަކުރެވެއެވެ.
• ރާޅުގެ އުސްމިން 3 ފޫޓާއި 6 ފޫޓާ ދެމެދުގައި ހުރުމަށް ލަފާކުރެވެއެވެ.
އިތުރު މަޢުލޫމާތު:
• މި ވިއްސާރައަކީ ރާއްޖޭގެ ސަރަޙައްދުގައި އުފެދިފައިވާ ޓްރަފަކާ ގުޅިގެން ކުރަމުންދާ ވިއްސާރައެކެވެ.
• މޫސުން ރަނގަޅުވާނެކަމަށް ލަފާކުރެވެނީ މި މަހުގެ 11 ވަނަ ދުވަހުއެވެ.
• ކުރިއަށް އޮތް ދެ ދުވަހުވެސް މޫސުން ގޯސްވެދާނެކަމަށް ލަފާކުރެވޭތީ، އެންމެހައި ފަރާތްތަކުން މޫސުމަށް ސަމާލުވުމަށް އިލްތިމާސް ކުރެވެއެވެ.
ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭވެހިފައިވަނީ ލ. ކައްދޫއަށް ކަމަށްވާއިރު، އެރަށަށް 159.5 މިލިމީޓަރުގެ ވާރޭވެހިފައިވާކަން ފާހަގަކުރެވެއެވެ.
ކިޔުންތެރިންގެ ހިޔާލު