ހދ. ހަނިމާދޫގައި ޢިމާރާތްކުރަމުންދާ މިސްކިތުގެ ނުނިމިހުރި މަސައްކަތް ފުރިހަމަކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ މަސައްކަތް ޙަވާލުކޮށްފިއެވެ. މިނިސްޓްރީ އޮފް އިސްލާމިކް އެފެއާޒުން އެމްޓީސީސީއާއެކު ވެވުނު އެއްބަސްވުމުގެ ދަށުން، ހަނިމާދޫގައި މިހާރު މަސައްކަތް މެދުކެނޑިފައިވާ މިސްކިތުގެ އެންމެހައި ނުނިމިހުރި މަސައްކަތްތައް ފުރިހަމަކުރުން ހިމެނެއެވެ.
ހަނިމާދޫގައި މިސްކިތް ތަރައްޤީކުރެވެނީ 7,933 އަކަފޫޓުގެ ބިމެއްގައެވެ. މިއީ 500 ނަމާދުވެރިންނަށް ޖާގަދެވޭ މިސްކިތެކެވެ. މި މަޝްރޫޢު ޙަވާލުކޮށްފައިވަނީ 9.44 މިލިއަން ރުފިޔާއަށް، 360 ދުވަހުގެ ތެރޭގައި ނިންމުމަށެވެ.
މި މަޝްރޫޢު އެމްޓީސީސީއާ ޙަވާލުކުރުމަށް މިނިސްޓްރީ އޮފް އިސްލާމިކް އެފެއާޒުގައި ބޭއްވުނު ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ، އެ ކުންފުނީގެ މެނޭޖިންގ ޑިރެކްޓަރ އަލްފާޟިލް އަޙްމަދު ސަޢުދީއެވެ. އަދި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އަލްފާޟިލް އިބްރާހީމް އާސިމެވެ.
2,645 މީހުންގެ އާބާދީއެއް ދިރިއުޅޭ ހަނިމާދޫއަކީ ބައިނަލްއަޤްވާމީ ވައިގެ ބަނދަރެއް ޤާއިމްކުރެވިފައިވާ ރަށަކަށްވުމާއެކު، ގިނަ އަދަދެއްގެ ބަޔަކު އެރަށަށް ޒިޔާރަތްކުރެއެވެ. ވޭތުވެދިޔަ 44 އަހަރުގެ ތެރޭގައި އެމްޓީސީސީން ވަނީ ދިވެހިރާއްޖޭގެ އެކި ކަންކޮޅުތަކުގައި ގިނަގުނަ ތަރައްޤީގެ މަޝްރޫޢުތަކެއް ކާމިޔާބުކަމާއެކު ކުރިއަށް ގެންގޮސްފައެވެ.
