ސަޢުދީ ޢަރަބިއްޔާގެ ޙައްޖާއި ޢުމްރާއާބެހޭ ވުޒާރާއިން ވަނީ ކުރިއަށް އޮތް ޙައްޖު މޫސުމަށް ތައްޔާރުވުމުގެ ގޮތުން މުހިންމު އިޢުލާނެއް ކޮށްފައެވެ. މި އިޢުލާނުގައި ބޭރު ޤައުމުތަކުން ސަޢުދީ ޢަރަބިއްޔާއަށް ދަތުރުކޮށްފައިވާ ޢުމްރާވެރިން އޭޕްރިލް މަހުގެ 29 ވަނަ ދުވަހުގެ ކުރިން ސަޢުދީ ޢަރަބިއްޔާއިން ފުރަންޖެހޭނެ ކަމަށް ބަޔާންކޮށްފައިވެއެވެ.
އެ ވުޒާރާއިން ނެރުނު ބަޔާނުގައި ވާގޮތުން، ޙައްޖު މޫސުމުގެ ކުރިން ޢުމްރާ އަދާކުރުމަށް ބޭރު ޤައުމުތަކުގެ ޢުމްރާވެރިންނަށް ސަޢުދީ ޢަރަބިއްޔާއަށް ވަދެވޭނެ އެންމެ ފަހު ތާރީޚަކީ އޭޕްރިލް މަހުގެ 13 ވަނަ ދުވަހެވެ. އަދި އޭޕްރިލް މަހުގެ 29 ވަނަ ދުވަހުގެ ކުރިން ހުރިހާ ޢުމްރާވެރިން ވެސް ސަޢުދީ ޢަރަބިއްޔާއިން ފުރަންޖެހޭނެއެވެ. މި ތާރީޚަށްފަހު ސަޢުދީ ޢަރަބިއްޔާގައި ޢުމްރާވެރިން ތިބުމަކީ ޤާނޫނީ ފިޔަވަޅު އެޅޭނެ ކަމެއްކަމުގައި އެ ވުޒާރާއިން ސަމާލުކަން ދީފައިވެއެވެ.
ޢުމްރާވެރިންނާއި ޢުމްރާވެރިން ސަޢުދީ ޢަރަބިއްޔާއަށް ގެންދިއުމުގެ ޚިދުމަތް ފޯރުކޮށްދޭ ޖަމާޢަތްތަކަށް މި ތާރީޚުތަކަށް ސަމާލުކަން ދިނުމަށާއި، ކަނޑައެޅިފައިވާ ޤަވާޢިދުތަކާއި އިރުޝާދުތަކާ އެއްގޮތަށް ޢަމަލުކުރުމަށް އެ ބަޔާނުގައި އިލްތިމާސްކޮށްފައިވެއެވެ.
އިތުރު ފިޔަވަޅެއްގެ ގޮތުން، ކަނޑައެޅިފައިވާ ތާރީޚުގެ ކުރިން ޢުމްރާވެރިން ސަޢުދީ ޢަރަބިއްޔާއިން ފުރައިގެން ނުދާނަމަ، އަދި އެކަން އެ ވުޒާރާއަށް ނާންގާނަމަ، ގިނަވެގެން 100,000 ރިޔާލުން ޖޫރިމަނާ ކުރެވޭނެ ކަމުގެ އިންޒާރު ވެސް އެ ވުޒާރާއިން ދީފައިވެއެވެ.
