ދިވެހިރާއްޖެއާއި މޯލްޓާގެ މެދުގައި އެކި ދާއިރާތަކުން ގުޅުން ހަރުދަނާކުރުމަށްޓަކައި މުހިންމު މަޝްވަރާތަކެއް ކުރިއަށް ގެންގޮސްފިއެވެ. މި މަޝްވަރާތައް ބޭއްވުނީ ޚާރިޖީ ވަޒީރު ޑރ. ޢަބްދުﷲ ޚަލީލް މޯލްޓާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
މޯލްޓާގެ ބޮޑުވަޒީރުގެ ނައިބު އަދި ޚާރިޖީ އަދި ފަތުރުވެރިކަމުގެ ވަޒީރު ޑރ. އިއަން ބޯގްއާއެކު ބޭއްވުނު ބައްދަލުވުމުގައި، ދެ ޤައުމުގެ މެދުގައި ހުރި އެއްގޮތްތަކުގެ މައްޗަށް އަލިއަޅުވާލައްވައި، މި ދަތުރުފުޅަކީ ދެ ޤައުމުގެ ގުޅުން އިތުރަށް ވަރުގަދަކުރުމަށް އެޅުނު މުހިންމު ފިޔަވަޅެއްކަން ފާހަގަކުރެއްވިއެވެ.
ކުދި ޖަޒީރާ ޤައުމުތަކެއްގެ ހައިސިއްޔަތުން، ތިމާވެށީގެ ދާއިރާއިން، ޚާއްޞަކޮށް އިޢާދަކުރަނިވި ހަކަތައަށް ބަދަލުވުމުގައި ގުޅިގެން މަސައްކަތްކުރުމަށާއި، ވިޔަފާރީގެ އައު ފުރުޞަތުތައް އުފެއްދުމަށް މަގުފަހިކުރުމާ ގުޅޭގޮތުން މަޝްވަރާކުރެވުނެވެ. މީގެ އިތުރުން، ބޭރުގެ އިންވެސްޓްމަންޓްތައް އިތުރުކުރުމަށް މަސައްކަތްކުރުމަށް ދެ ފަރާތުން އެއްބަސްވިއެވެ.
ފަތުރުވެރިކަމާއި މަތީ ތަޢުލީމުގެ ދާއިރާއިން ގުޅުން ހަރުދަނާކޮށް، ދެ ޤައުމުގެ ރައްޔިތުންގެ މެދުގައި ގުޅުން ބަދަހިކުރުމުގެ މުހިންމުކަމަށްވެސް ދެ ވަޒީރުން އަލިއަޅުވާލެއްވިއެވެ.
ޚާރިޖީ ވަޒީރުގެ މި ދަތުރުފުޅުގައި މޯލްޓާގެ ކެބިނެޓުގެ އިތުރު ބައެއް ވަޒީރުންނާވެސް ބައްދަލުކުރައްވައި، ދެ ޤައުމު ގުޅިގެން ކުރިއަށް ގެންދެވިދާނެ މަޝްރޫޢުތަކާ ގުޅޭގޮތުން އިތުރު މަޝްވަރާތައް ކުރިއަށް ގެންދެވޭނެ ކަމަށް ބެލެވެއެވެ.
ކިޔުންތެރިންގެ ހިޔާލު