ފެނާއި ނަރުދަމާގެ ޚިދުމަތަކީ ރައްޔިތުންގެ އަސާސީ ޙައްޤުތަކުގެ ތެރޭގައި ހިމެނޭ އެންމެ މުހިންމު އެއް ޚިދުމަތެވެ. މި ޚިދުމަތް ރާއްޖޭގައި ފޯރުކޮށްދިނުމުގައި އެންމެ އިސް ދައުރެއް އަދާކުރަމުން އަންނަ ކުންފުންޏަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އެވެ. މިއަހަރަކީ އެމްޑަބްލިއުއެސްސީ އުފެދުނުތާ 30 އަހަރު ފުރޭ އަހަރެވެ. މި ލިޔުމުގައި އަޅުގަނޑުމެން ބަލައިލާނީ އެމްޑަބްލިއުއެސްސީގެ ކާމިޔާބު 30 އަހަރުގެ ދަތުރަށެވެ.

އެމްޑަބްލިއުއެސްސީ އުފެދުނީ 1995 ވަނަ އަހަރުގެ އޭޕްރީލް މަހުގެ 1 ވަނަ ދުވަހުއެވެ. އެއީ އޭރު މާލޭގައި އުޅުނު 60،000 މީހުންގެ އާބާދީއަށް ކުރިމަތިވަމުންދިޔަ ފެނާއި ނަރުދަމާގެ މައްސަލަ ހައްލުކުރުމަށް ޚާއްޞަކޮށްގެން އުފެއްދި ކުންފުންޏެކެވެ. އެމްޑަބްލިއުއެސްސީ އުފެދުނުއިރު އެކުންފުނީގައި ތިބީ އެންމެ 60 މުވައްޒަފުންނެވެ. އަދި ދުވާލަކު އުފެއްދޭ ފެނުގެ މިންވަރަކީ 900 ކިއުބިކް މީޓަރެވެ. ފެން ރައްކާކުރެވޭ މިންވަރު ހުރީ 10،000 ކިއުބިކް މީޓަރުގައެވެ.

ނަމަވެސް، މިއަދު އެމްޑަބްލިއުއެސްސީގެ ޚިދުމަތް ވަނީ ވަރަށް ބޮޑުތަން ފުޅާވެފައެވެ. މިހާރު އެކުންފުނީގައި 1013 މުވައްޒަފުން މަސައްކަތް ކުރެއެވެ. އަދި ދުވާލަކު 47،300 ކިއުބިކް މީޓަރުގެ ފެން އުފެއްދޭއިރު، 44،858 ކިއުބިކް މީޓަރުގެ ފެން ރައްކާކުރެވެއެވެ. މިއީ ކުންފުނި އުފެދުނުއިރާ އަޅާބަލާއިރު ވަރަށް ބޮޑު ކުރިއެރުމެކެވެ.

އެމްޑަބްލިއުއެސްސީ އުފެދުނީ ހަމައެކަނި މާލެއަށް ޚިދުމަތް ދިނުމަށް ކަމުގައިވިޔަސް، މިއަދު އެކުންފުނިން ޚިދުމަތް ދެމުންދަނީ މާލެ، ވިލިމާލެ، ހުޅުމާލެ، ގުޅިފަޅު، ތިލަފުށި، ކ. މާފުށި، ރ. ދުވާފަރު އަދި ހދ. ކުޅުދުއްފުށި ހިމެނޭގޮތުން 2 ލައްކައަށްވުރެ ގިނަ މީހުންގެ އާބާދީއަކަށެވެ. މިއީ ރާއްޖޭގެ މުޅި އާބާދީގެ ގާތްގަނޑަކަށް 50 އިންސައްތައެވެ.

އެމްޑަބްލިއުއެސްސީގެ އެންމެ މުހިންމު އެއް އަމާޒަކީ ވޯޓަރ ސެކިއުރިޓީ ނުވަތަ ފެނުގެ ޚިދުމަތުގެ ކަށަވަރުކަން އިތުރުކުރުމެވެ. މިގޮތުން، ގްރޭޓަރ މާލެ ސަރަހައްދުގައި ފެން އުފައްދާ ތިން މަރުކަޒެއް ޤާއިމްކޮށް، ފެން އުފެއްދުން ވަނީ ލާމަރުކަޒު ކުރެވިފައެވެ. އަދި މާލެއާއި ހުޅުމާލޭގައި އިތުރު ފެން ރައްކާކުރާ ތާނގީތަކާއި ފެން ޕްލާންޓްތައް ބެހެއްޓުމުގެ މަސައްކަތް ދަނީ ކުރެވެމުންނެވެ. މި މަސައްކަތްތަކުގެ ސަބަބުން މިއަހަރު ނިމޭއިރު ފެން އުފެއްދުމުގެ ޤާބިލުކަން 26 އިންސައްތަ އަދި ފެން ރައްކާކުރެވޭ މިންވަރު 28 އިންސައްތަ އިތުރުވާނެ ކަމަށް އެމްޑަބްލިއުއެސްސީން ލަފާކުރެއެވެ.

އެމްޑަބްލިއުއެސްސީގެ އެހެން އެއް މުހިންމު މަޝްރޫޢަކީ މާލެއާއި ހުޅުމާލޭގެ ފެނުގެ ވިއުގަ ގުޅާލުމެވެ. މި މަޝްރޫޢުގެ ދަށުން ސިނަމާލެ ބްރިޖް މެދުވެރިކޮށް ފެނުގެ މައި ވިއުގައެއް އަޅައި، މާލެއާއި ހުޅުމާލޭގައި ޓްރާންސްފަރ ޕަމްޕް ސްޓޭޝަންތައް ޤާއިމްކުރެވެމުންދެއެވެ. މި މަޝްރޫޢު ނިމުމުން، ބޭނުންވެއްޖެ ހިނދެއްގައި މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް ގަޑިއަކު 800 ޓަނުގެ ފެން ޕަންޕުކުރުމުގެ ޤާބިލުކަން ލިބިގެންދާނެއެވެ.

އެމްޑަބްލިއުއެސްސީގެ މަސައްކަތްތައް ހަމައެކަނި މާލެ ސަރަޙައްދަށް ބަންދެއް ނުވެއެވެ. އެކުންފުނިން ރާއްޖޭގެ އެކި ރަށްރަށުގައި ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތްވެސް ކުރަމުންދެއެވެ. މިހާތަނަށް 107 މަޝްރޫޢުގެ މަސައްކަތް ނިންމާލާފައިވާއިރު، މިއަހަރު އިތުރު 32 މަޝްރޫޢުގެ މަސައްކަތް ދަނީ ކުރެވެމުންނެވެ. މީގެ ތެރޭގައި ފެނުގެ 17 މަޝްރޫޢުއާއި ނަރުދަމާގެ 15 މަޝްރޫޢު ހިމެނެއެވެ.

އެމްޑަބްލިއުއެސްސީގެ މަސައްކަތްތައް ހަމައެކަނި ފެނާއި ނަރުދަމާގެ ޚިދުމަތަށް ވެސް ބަންދެއް ނުވެއެވެ. އެކުންފުނިން މިހާރު ދަނީ އިންޖިނިއަރިންގ، ޓްރޭޑިންގ އަދި މެނިފެކްޗަރިންގގެ ދާއިރާއިންވެސް ޚިދުމަތް ފޯރުކޮށްދެމުންނެވެ. މީގެ ތެރޭގައި ފެނާއި ނަރުދަމާ ނިޒާމު ފަރުމާކުރުމާއި، ޤާއިމްކުރުމާއި، އޮޕަރޭޓްކުރުމާއި، އަދި ފެން ޕްލާންޓް އަމިއްލައަށް ޑިޒައިންކޮށް ފެބްރިކޭޓްކުރުން ހިމެނެއެވެ.

މީގެ އިތުރުން، އެމްޑަބްލިއުއެސްސީގެ އައިއެސްއޯ ސްޓޭންޑަރޑްގެ ލެބޯރެޓަރީން ރިޒޯޓުތަކާއި ފަންނީ ކޮންސަލްޓަންޓުންނަށް ވިޔަފާރީގެ އުސޫލުން ފެން ތަޙުލީލުކުރުމުގެ ޚިދުމަތް ފޯރުކޮށްދެއެވެ. އަދި ފުޅީގައި ބަންދުކޮށްފައިވާ ފެން އުފެއްދުމާއި، ފެނާއި ނަރުދަމާގެ މަސައްކަތްތަކަށާއި ފެން ވަޔަރިންގއަށް ބޭނުންވާ އެކި ސައިޒުގެ ހޮޅި އުފެއްދުމާއި، ކަރަންޓު ވަޔަރިންގއަށް ބޭނުންވާ އެކި ސައިޒުގެ ކޮންޑިއުޓް ހޮޅި އުފެއްދުމުގެ މަސައްކަތްވެސް ކުރަމުންދެއެވެ.

އެމްޑަބްލިއުއެސްސީގެ އަނެއް މުހިންމު ކާމިޔާބީއަކީ އެކުންފުންޏަކީ ސަރުކާރު ހިއްސާވާ ކުންފުނިތަކުގެ ތެރެއިން އަމިއްލަ ފައިމައްޗަށް ތެދުވެ، ސަބްސިޑީއަކާ ނުލައި ހިންގަމުންދާ ކުންފުންޏަކަށް ވުމެވެ. މިއީ އެކުންފުނީގެ ހަރުދަނާ މެނޭޖްމަންޓާއި ދެމެހެއްޓެނިވި ވިޔަފާރި މޮޑެލްގެ ހެއްކެކެވެ.

ރ. ދުވާފަރުގައި އެމްޑަބްލިއުއެސްސީން ދެމުންދާ ޚިދުމަތްތަކަކީ އެކުންފުނީގެ ޚިދުމަތްތައް އިތުރަށް ފުޅާކުރުމުގެ ރަނގަޅު މިސާލެކެވެ. އެރަށުގައި ފެނާއި ނަރުދަމާގެ އިތުރުން، ކަރަންޓާއި ކުނި މެނޭޖްކުރުމާއި، މަސްވެރިންނަށް އައިސްށް އައިސް ފޯރުކޮށްދިނުމުގެ ޚިދުމަތްވެސް އެމްޑަބްލިއުއެސްސީން ދެމުންދެއެވެ. މިއީ އެކުންފުނީގެ ވިޔަފާރި ފުޅާކޮށް، ފައިދާ އިތުރުކުރުމަށް ކުރަމުންދާ މަސައްކަތުގެ ބައެކެވެ.

އެމްޑަބްލިއުއެސްސީގެ 30 އަހަރުގެ ދަތުރުގައި އެކުންފުނިން ވަނީ ގިނަގުނަ ގޮންޖެހުންތަކާ ކުރިމަތިލާންޖެހިފައެވެ. އޭގެ ތެރޭގައި އާބާދީ އިތުރުވުމާއި، ތިމާވެށީގެ ބަދަލުތަކާއި، އިޤްތިޞާދީ ގޮންޖެހުންތައް ހިމެނެއެވެ. ނަމަވެސް، މި ހުރިހާ ގޮންޖެހުމަކާ ކުރިމަތިލައި، އެކުންފުނިން ވަނީ އެކި ގޮތްގޮތުން ކުރިއަރައި، ރާއްޖޭގެ ފެނާއި ނަރުދަމާގެ ދާއިރާގައި އިސް ދައުރެއް އަދާކުރާ ކުންފުންޏަކަށް ވެފައެވެ.

އެމްޑަބްލިއުއެސްސީގެ 30 އަހަރުގެ ދަތުރަކީ ކާމިޔާބު ދަތުރެކެވެ. ހަމައެކަނި މާލެއަށް ޚިދުމަތް ދިނުމަށް އުފެދުނު ކުންފުންޏެއްގެ ގޮތުގައި ފެށި ނަމަވެސް، މިއަދު އެކުންފުންޏަކީ ރާއްޖޭގެ އާބާދީގެ ދެބައިކުޅަ އެއްބަޔަށްވުރެ ގިނަ މީހުންނަށް ޚިދުމަތް ދޭ، އަދި ފެނާއި ނަރުދަމާގެ އިތުރުން އެހެނިހެން ދާއިރާތަކުންވެސް ޚިދުމަތް ފޯރުކޮށްދޭ ކުންފުންޏެކެވެ. އެމްޑަބްލިއުއެސްސީގެ ކުރިމަގު އަދިވެސް އުޖާލާކަމަށް ޝައްކެއް ނެތެވެ. އަދި ކުރިއަށް އޮތް އަހަރުތަކުގައިވެސް ރާއްޖޭގެ ފެނާއި ނަރުދަމާގެ ދާއިރާގައި އެކުންފުނިން މުހިންމު ދައުރެއް އަދާކުރާނެކަން ކަށަވަރެވެ.