ފިޠުރު ޢީދު ފާހަގަކުރުމުގެ ހަރަކާތްތައް ކާމިޔާބުކަމާއެކު އިންތިޒާމުކޮށް ކުރިއަށް ގެންދިއުމަށް އެހީތެރިވި އެންމެހައި ފަރާތްތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ ޝުކުރެއް އަދާކުރައްވައިފިއެވެ. މިއަހަރުގެ ޢީދު ހަރަކާތްތައް ކުރިއަށް ގެންދެވިފައިވަނީ ސަރުކާރުގެ ވުޒާރާތަކާއި ސަރުކާރު ހިއްސާވާ ކުންފުނިތަކުގެ މެދުގައި އޮތް ގުޅުންތެރި މަސައްކަތުގެ ނަތީޖާއެއްގެ ގޮތުންނެވެ. ރާއްޖޭގެ އެކި ކަންކޮޅުތަކުގައި 1446 ވަނަ އަހަރުގެ ފިޠުރު ޢީދު ވަނީ ކުލަގަދަކޮށް ފާހަގަކުރެވިފައެވެ. އަދި ޢީދުގެ އުފަލުގައި ހުރިހާ ރައްޔިތުން ބައިވެރިކުރުމަށްޓަކައި ސަރުކާރުން ވަނީ ގިނަގުނަ މަސައްކަތްތަކެއް ކުރައްވާފައެވެ.
ރައީސުލްޖުމްހޫރިއްޔާ މީސްމީޑިއާގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ، ޢީދު ފާހަގަކުރުމުގެ އިންތިޒާމުތައް ހަމަޖައްސައި، ކުޑަކުދިންނާއި ޢާއިލާތަކަށް އުފާވެރިކަން ގެނެސްދިނުމުގައި ބައިވެރިވި އެންމެހައި ފަރާތްތަކަށް ޝުކުރު އަދާކުރައްވާ ކަމަށެވެ. މި މަސައްކަތުގައި 4 ވުޒާރާއަކާއި، ދިވެހި ފުލުހުންގެ ޚިދުމަތާއި ސިފައިންގެ އިތުރުން ޕީއެސްއެމް ހިމެނޭ ގޮތަށް ސަރުކާރު ހިއްސާވާ 10 ކުންފުންޏެއް ބައިވެރިވެފައިވެއެވެ.
ސަރުކާރުން މިއަހަރު ޢީދު ފާހަގަކުރުމަށް ކުރެއްވި މަސައްކަތްތަކުގެ ތެރޭގައި މުޅި ރާއްޖެ ޢީދަށް ދިއްލާލުން ހިމެނެއެވެ. މި މަސައްކަތުގެ ދަށުން ރާއްޖޭގެ 64 ރަށެއްގައި ޢީދު ލައިޓުތައް ހަރުކޮށް ދިއްލާފައިވެއެވެ. މީގެ ތެރޭގައި ރާއްޖޭގެ އާބާދީ ބޮޑެތި ރަށްތަކާއި ސިޓީތައް ހިމެނެއެވެ. މިއީ ރައީސުލްޖުމްހޫރިއްޔާގެ އިސްނެންގެވުމުގެ މަތިން ކޮންމެ ޢީދަކާ ދިމާކޮށް ކުރިއަށް ގެންދަވާ މަސައްކަތެކެވެ.
މީގެ އިތުރުން، ރާއްޖޭގައި ޢީދު ފާހަގަކުރުމުގެ ސަޤާފަތް ދައްކުވައިދިނުމުގެ ގޮތުން، ހިއްޗަށް ވަޑައިގަތުމުގެ ހަރަކާތުގެ ތަމްސީލެއް މާލޭގެ މަގުތަކުގައި ބޭއްވިފައިވެއެވެ. އަދި މާލެ ސަރަހައްދުގައި ޢީދު ކުލަގަދަކޮށް ފާހަގަކުރުމަށްޓަކައި، ސަލްޓަން ޕާކުަލްޓަން ޕާކު، ޝަހީދުންގެ ބިނާ އަދި ޖުމްހޫރީ މައިދާނުގައި ކުޑަކުދިންގެ ޢާއިލީ ހަވީރެއް ބޭއްވިފައިވެއެވެ. މި ހަވީރުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެން ކުދިންނާ ބައްދަލުކުރައްވައި، ފޮޓޯ ނަންގަވައި ވަގުތުކޮޅެއް ހޭދަކުރެއްވިއެވެ.
މި ހަވީރަށް ލިބުނު ތަރުހީބުގެ ސަބަބުން، އިތުރު ދެ ދުވަހަށް ހަވީރުގެ ހަރަކާތްތައް ކުރިއަށް ގެންދިއުމަށް ސަރުކާރުން ނިންމަވާފައިވެއެވެ. މި ހަވީރުގައި ބައިވެރިވުމަށް އެތައް ސަތޭކަ ބަޔަކު، ޚާއްޞަކޮށް ގިނަ އަދަދެއްގެ ކުޑަކުދިން، މި ސަރަހައްދުތަކަށް އެއްވުމުން، އާންމުން މިފަދަ ހަރަކާތްތަކަށް ދެއްވާ އަހައްމިއްޔަތުކަން ވަރަށް ބޮޑަށް ފާހަގަކުރެވިގެން ދިޔައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢީދުފަދަ މުނާސަބަތުތަކުގައި ރައްޔިތުންނަށް އުފާފާޅުކުރުމުގެ ފުރުޞަތު ފަހިކޮށްދިނުމަށް ޚާއްޞަ އަހައްމިއްޔަތުކަމެއް ދެއްވައެވެ. ސަރުކާރުގެ ދެކިވަޑައިގަތުމުގައި، މިފަދަ އިސްލާމީ މުނާސަބަތުތައް ފާހަގަކުރުމުގެ ސަބަބުން ކުޑަކުދިންގެ ހިތްތަކުގައި އިސްލާމްދީނަށް ލޯބި ޖެހި، ދީނުގެ ކަންކަން އުނގެނުމަށް ޝައުޤުވެރިކަން އިތުރުވެގެންދާނެއެވެ.
މިއަހަރުގެ ފިޠުރު ޢީދު ފާހަގަކުރުމުގައި ސަރުކާރުގެ އެކި އިދާރާތަކާއި ކުންފުނިތަކުން ދެއްކެވި އެއްބާރުލުމާއި، ރައްޔިތުންގެ ފަރާތުން ލިބުނު ތަރުހީބަކީ ޤައުމީ އެއްބައިވަންތަކަމާއި އުފާވެރިކަން އާލާކުރުމަށް ލިބުނު ބޮޑު ހިތްވަރެކެވެ. މި މަސައްކަތުގައި ބައިވެރިވި އެންމެހައި ފަރާތްތަކަށް ރައީސުލްޖުމްހޫރިއްޔާ ޚާއްޞަ ޝުކުރެއް ރައްދުކުރެއްވުމަކީ، މުސްތަޤުބަލުގައިވެސް މިފަދަ ހަރަކާތްތައް އިތުރަށް ފުޅާކުރުމަށް ލިބިގެންދާނެ ހިތްވަރެކެވެ.
