ހުޅުމާލެ އަޒީޒާ މިސްކިތުގައި މިއަދު އީދު ނަމާދުކުރުމަށްޓަކައި ހަވާލުކުރި އިމާމު ހާޒިރުނުވުމުން އޭނާ ސަސްޕެންޑުކުރަން އަންގައިފިއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު މީޑިއާތަކަށް ފޮނުއްވި މެސެއްގައި ވިދާޅުވީ، އަޒީޒާ މިސްކިތުގައި އީދު ނަމާދުކުރުމަށްޓަކައި ހަވާލުކުރި އިމާމާއި އޭނާގެ ބަދަލުގައި ހަމަޖެއްސި އިމާމު ވެސް އީދު ނަމާދުކުރަން މިސްކިތަށް ހާޒިރުވެފައި ނުވާ ކަމަށެވެ.
އެ ދެ އިމާމު ވެސް ހާޒިރުނުވުމުން، އެ މައްސަލަ އުސޫލުގެ ތެރެއިން ބަލައި ފަސް އަހަރު ދުވަހަށް ރާއްޖޭގެ ހުރިހާ ރަށެއްގައި ހުތުބާ ކިޔުމުން ސަސްޕެންޑްކުރަން އަންގާފައިވާނެ ކަމަށް މިނިސްޓަރު ޝަހީމް ވިދާޅުވިއެވެ.
މިނިސްޓަރު ވިދާޅުވީ، އިމާމުގެ ބަދަލު އިމާމުގެ ގޮތުގައި ހަމަޖައްސާފައިވަނީ އަޒީޒާ މިސްކިތުގައި ހުންނަ އަސްލު އިމާމު ކަމަށާއި ނަމަވެސް މިނިސްޓްރީއަށް ނާންގައި އޭނާ މިއަދުގެ އީދު ނަމާދުގެ ޖަމާއަތަށް ހާޒިރުނުވާތީ އެ މައްސަލަ ވަކިން ބަލައި އުސޫލުގެ ތެރެއިން އިމާމުކަމުގެ ވަޒީފާއިން ސަސްޕެންޑްކުރަން ކަމާބެހޭ ޔުނިޓަށް އަންގާފައިވާ ކަމަށެވެ.
ދެ އިމާމު ވެސް ހާޒިރުނުވުމުން އަޒީޒާ މިސްކިތުގައި މިއަދުގެ އީދު ނަމާދު ފަށާފައިވަނީ އެހެން މިސްކިތްތަކަށްވުރެ ފަހުންނެވެ. އިމާމެއް ނެތުމުން ބަދަލުގައި އިމާމުވެ ނަމާދުކޮށްފައިވަނީ މިސްރަށް ނިސްބަތްވާ މީހެކެވެ. އޭނާ ހުތުބާ ކިޔާފައިވަނީވެސް ފޯނުން ބަލައިގެން އަރަބި ބަހުންނެވެ.
ކިޔުންތެރިންގެ ހިޔާލު