ފިތުރު އީދު ފާހަގަކުރުމަށް ހުޅުމާލޭ ސެންޓްރަލް ޕާކުގައި މިރޭ ހަވާ އެރުވުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ.
އެޗްޑީސީން ބުނީ ސެންޓްރަލް ޕާކުގައި ހަވާ އަރުވާނީ މިރޭ 9:00 ގައި ކަމަށާއި އޭގެ ކުރިން 8:30 ގައި 30 މިނެޓަށް ޑްރޯން ޝޯއެއް ވެސް ކުރިއަށްދާނެ ކަމަށެވެ.
އީދު ފާހަގަކުރުމަށް އެޗްޑީސީން ސެންޓްރަލް ޕާކުގައި ދެން ރާވާފައިވާ ހަރަކާތަކީ ކުޑަކުދިންގެ ހަވީރެވެ. އެ ހަވީރު ކުރިއަށްގެންދިއުމަށް ހަމަޖެހިފައިވަނީ މިއަދު ހަވީރު 4:00 އިން ފެށިގެން 5:45 އަށެވެ.
މިއަދު ހަވީރު މާލޭގައި ވެސް ކުޑަކުދިންގެ ހަވީރެއް ބޭއްވުމަށް ވަނީ ހަމަޖެހިފައެވެ. ސަރުކާރު ކުންފުނިތަކާ ގުޅިގެން އެމްއެންޑީއެފުން ބާއްވާ އެ ހަވީރު ކުރިއަށްގެންދިއުމަށް ހަމަޖެހިފައިވަނީ މިއަދު ހަވީރު 4:00 އިން 6:00 އަށެވެ. އެ ހަރަކާތް ކުރިއަށްދާނީ ސަލްޓަން ޕާކު، ޝަހީދުންގެ ބިނާ ސަރަހައްދު އަދި ޖުމްހޫރީ މައިދާނު ސަރަހައްދުގައެވެ.
