ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ހާމަކުރެއްވި ގޮތުގައި، ދިވެހި ރައްޔިތެއްކަން އަންގައިދޭ ކާޑު (އައިޑީ ކާޑު) ޕްރިންޓްކޮށް ދޫކުރުމުގެ ޚިދުމަތް ގދ. އަތޮޅަށް ފުޅާކޮށްފައިވެއެވެ. މި ޚިދުމަތުގެ ދަށުން، ގދ. އަތޮޅު ކައުންސިލުން އައިޑީ ކާޑު ޕްރިންޓްކޮށް، އަތޮޅުގެ އެހެން ރަށްރަށަށް ފޮނުވުމުގެ މަސައްކަތް ކުރިއަށް ގެންދާނެއެވެ. މިކަމުގެ ސަބަބުން އައިޑީ ކާޑުގެ ޚިދުމަތް އިތުރަށް އަވަސްވެ، ހަރުދަނާވެގެންދާނެ ކަމަށް ޑީއެންއާރުން ފާހަގަކުރައްވައެވެ.
ގދ. އަތޮޅަކީ މާލެއިން ބޭރުގައި އައިޑީ ކާޑު ޕްރިންޓްކޮށް ދޫކުރުމުގެ ޚިދުމަތްދޭ 14 ވަނަ ސަރަޙައްދެވެ. ރާއްޖޭގެ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ފޯރުކޮށްދިނުމަކީ ސަރުކާރުގެ ސިޔާސަތުގެ ތެރޭގައި ހިމެނޭ ކަމެކެވެ. މި ސިޔާސަތުގެ ދަށުން، އަތޮޅުތެރޭގައި އައިޑީ ކާޑު ޕްރިންޓްކުރުމުގެ ޚިދުމަތް ފުރަތަމަ ފަހަރަށް ފެށިފައިވަނީ ގއ. ވިލިނގިލީގައެވެ.
ޑީއެންއާރުގެ 174 ކަލެކްޓިންގ ސެންޓަރު ޤާއިމުކޮށްފައިވާއިރު، އޮންލައިންކޮށް އައިޑީ ކާޑު ހެދުމުގެ މަސައްކަތް ފުރަތަމަ ފަހަރަށް ފެށިފައިވަނީ ކޮވިޑް-19 އާ ގުޅިގެން 2021 ވަނަ އަހަރުގައެވެ. އަދި މިދިޔަ އަހަރުގެ މާރިޗު މަހުގެ ތެރޭގައި، އަމިއްލައަށް ކާޑަށް އެދި ހުށަހެޅޭނެ އައު އޮންލައިން ޕޯޓަލްއެއް ޤާއިމުކުރެވުނެވެ. މީގެ އިތުރުން، ކާޑު ޕްރިންޓްކުރުމަށްފަހު، އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ޚިދުމަތްވެސް ތަޢާރަފުކުރެވިފައިވެއެވެ.
ސަރުކާރުގެ އަމާޒަކީ އައިޑީ ކާޑު ހައްދައިދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫޢު މި އަހަރުގެ ތެރޭގައި ނިންމުމެވެ.
ކިޔުންތެރިންގެ ހިޔާލު