ޔުއެފާ ނޭޝަންސް ލީގުގެ ކުއާޓަރ ފައިނަލް ދެވަނަ ލެގުގައި އިޓަލީއާއި ޖަރުމަނުވިލާތް ވަނީ ކުލަގަދަ މެޗެއް ކުޅެ، 3-3 އިން އެއްވަރުވެފައެވެ. ނަމަވެސް، އެގްރިގޭޓް ނަތީޖާއިން 5-4 އަށް ކުރިހޯދައި، ޖަރުމަނުވިލާތް ވަނީ މުބާރާތުގެ ސެމީ ފައިނަލަށް ދަތުރުކޮށްފައެވެ.

ޖަރުމަނުވިލާތުގެ ސިގްނަލް އިދޫނާ ޕާކުގައި 64,000 އަށްވުރެ ގިނަ ކުޅިވަރު ލޯބިވެރިންގެ ހާޒިރުގައި ކުޅުނު މި މެޗުގެ ފުރަތަމަ ހާފުގައި ޖަރުމަނުވިލާތުން ވަނީ ތިން ލަނޑު ޖަހާފައެވެ. ޖޯޝުއާ ކިމިޗް، ޖަމާލް މުސިއާލާ އަދި ކްލެއިންޑިއެންސްޓްގެ ލަނޑުތަކާއެކު ޖަރުމަނުވިލާތުން ވަނީ ފުރަތަމަ ހާފުގައި އިޓަލީއަށްވުރެ އިސްވެގަނެފައެވެ.

ދެވަނަ ހާފުގައި އިޓަލީގެ ކުޅުމަށް ބަދަލުތަކެއް އައިސް، މޮއިސް ކީންގެ ދެ ލަނޑާއި ޖިއާކޯމޯ ރަސްޕަޑޯރީގެ ޕެނަލްޓީ ލަނޑާއެކު މެޗުގެ ނަތީޖާ 3-3 އަށް ބަދަލުވިއެވެ. ނަމަވެސް އެގްރިގޭޓް ނަތީޖާ އެއްވަރުކުރެވޭނެ ގޮތެއް އިޓަލީއަށް ނުވިއެވެ.

މި ކާމިޔާބީއާއެކު، ޖަރުމަނުވިލާތް ވަނީ މުބާރާތުގެ ސެމީ ފައިނަލުގައި ޕޯޗުގަލާ ކުރިމަތިލުމުގެ ފުރުޞަތު ހޯދާފައެވެ. މީގެ އިތުރުން، 2026 ވަނަ އަހަރުގެ ވޯލްޑްކަޕްގެ ކޮލިފައިންގ ގްރޫޕް އޭގައި ޖަރުމަނުވިލާތާއެކު ލަގްޒެމްބާރގް، ނޮދަން އަޔަލެންޑް އަދި ސްލޮވާކިޔާ ހިމެނޭކަން ފާހަގަކުރެވެއެވެ.