ފަތުރުވެރިކަމާއި ތިމާވެއްޓާ ބެހޭ ވުޒާރާއިން ވަނީ މިއަހަރުވެސް ދުނިޔޭގެ ފެންވަރުގައި ފާހަގަކުރާ “އާރތު އަވަރ” ދިވެހިރާއްޖޭގައި ފާހަގަކުރުމަށް ނިންމާފައެވެ. މި މުހިންމު ހަރަކާތުގައި ދިވެހި އެންމެހާ ރައްޔިތުންގެ އެއްބާރުލުން ހޯދުމަށް އެ ވުޒާރާއިން ވަނީ އިލްތިމާސްކޮށްފައެވެ. މިއަހަރަކީ މި ހަރަކާތް ބައިނަލްއަޤްވާމީ ފެންވަރުގައި އިންތިޒާމުކޮށް ބާއްވާ 18 ވަނަ އަހަރެވެ.

ކޮންމެ އަހަރެއްގެ މާރިޗު މަހުގެ އެންމެ ފަހު ހޮނިހިރު ދުވަހު ބައިނަލްއަޤްވާމީ ފެންވަރުގައި ގަޑިއިރަކަށް ބޮކިތައް ނިއްވާލައިގެން ފާހަގަކުރާ މި ދުވަސް، ދިވެހިރާއްޖޭގައިވެސް ފާހަގަކުރުމަށް ވަނީ ހަމަޖެހިފައެވެ. މިގޮތުން މިއަހަރުވެސް އެއް ގަޑިއިރަށް ބޮކިތައް ނިއްވާލައި “އާރތު އަވަރ” ފާހަގަކުރުމަށް ފަތުރުވެރިކަމާއި ތިމާވެއްޓާ ބެހޭ ވުޒާރާއިން ވަނީ ނިންމާފައެވެ.

މިއަހަރު މި ދުވަސް ދިމާވަނީ ރަމަޟާން މަހާ ކަމަށްވުމާއެކު، މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ ހޮނިހިރު ދުވަހުގެ ރޭ 21:45 އިން 22:45 އަށް ކަމަށް އެ ވުޒާރާއިން މަޢުލޫމާތު ދެއްވާފައިވެއެވެ. އެހެންކަމުން، ކޮންމެހެން ބޭނުންކުރަންޖެހޭ ތަކެތި ފިޔަވައި އެހެނިހެން ހުރިހާ ދިއްލުންތަކެއް މި ގަޑިއިރުގެ ތެރޭގައި ނިއްވާލުމަށް އެ ވުޒާރާއިން ވަނީ އާންމުންނަށް ގޮވާލާފައެވެ. މީގެ އިތުރުން، މި ހަރަކާތުގައި ދިވެހިރާއްޖޭގެ ރައްޔިތުންނާއި، ވިޔަފާރި ކުންފުނިތަކާއި، އެކިއެކި މަދަނީ ޖަމްޢިއްޔާތަކުން ބައިވެރިވުމަކީ އެ ވުޒާރާގެ އެދުމެއް ކަމުގައިވެސް ފާހަގަކޮށްފައިވެއެވެ.

ތިމާވެއްޓާ ބެހޭ ވުޒާރާއިން ވިދާޅުވެފައިވާ ގޮތުގައި، ދެމެހެއްޓެނިވި ގޮތެއްގައި ތިމާވެށި ޙިމާޔަތްކޮށް، ތިމާވެއްޓަށް އަންނަމުންދާ ބަދަލުތަކާއި، އެ ބަދަލުތަކުގެ ސަބަބުން ނެތިގެންދާ ދިރުންތަކާއި، މާޙައުލީ ބލީ ބަދަލުތަކަށް ހޭލުންތެރިކުރުވުމަށް ކުރާ މި މަސައްކަތްތަކަށް އެއްބާރުލުން ދިނުމަށް އެންމެން އެކުގައި މި ހަރަކާތުގައި ބައިވެރިވުމަކީ މުހިންމު ކަމެކެވެ.

މި ހަރަކާތަކީ ދުނިޔެ ހޫނުވުމާއި، ތިމާވެއްޓަށް އަންނަމުންދާ ބަދަލުތަކާމެދު ޢާންމުންގެ މެދުގައި ހޭލުންތެރިކަން އިތުރުކޮށް، ތިމާވެށި ރައްކާތެރިކުރުމަށް ދުނިޔޭގެ ފެންވަރުގައި ބާއްވާ މުހިންމު ހަރަކާތެކެވެ. މި ހަރަކާތުގެ މައިގަނޑު މަޤްޞަދަކީ، މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި، ޤުދުރަތީ ތަރިކަ ޙިމާޔަތްކުރުމަށް އެއްބައިވަންތަކަމުގެ އަޒުމް ދައްކުވައިދިނުމެވެ. އަދި ދުނިޔޭގެ އެކި ކަންކޮޅުތަކުން 60 މިނެޓުގެ ވަގުތަށް ރަމްޒީ ‘ލައިޓް އައުޓް’ ޕީރިއަޑެއްގައި ބައިވެރިވެ، ތިމާވެއްޓަށް އަންނަމުންދާ ބަދަލުތަކާ ދެކޮޅަށް މަސައްކަތްކުރުމަށް ވަކިވަކި ފަރުދުންނާއި، އަމިއްލަ ކުންފުނިތަކާއި މަދަނީ ޖަމްޢިއްޔާތަކުގެ ބައިވެރިވުން އިތުރުކުރުމެވެ.

“އާރތު އަވަރ” އެންމެ ފުރަތަމަ ފާހަގަކުރެވުނީ 2007 ވަނަ އަހަރު އޮސްޓްރޭލިއާގެ ސިޑްނީގައެވެ. އޭގެފަހުން މިއީ މުޅި ދުނިޔޭގައިވެސް ފާހަގަކުރަން ފން ފަށާފައިވާ ބައިނަލްއަޤްވާމީ މުހިންމު ކެމްޕޭނަކަށް ވެފައިވެއެވެ.

މި ހަރަކާތުގެ މުހިންމުކަން ދަލީލުކޮށްދެނީ އޭގެ ފުޅާ ދާއިރާގެ އަމާޒުތަކާއި ބައިވެރިވުމެވެ. މިގޮތުން:

1. ތިމާވެށީގެ ހޭލުންތެރިކަން އިތުރުކުރުން: މި ހަރަކާތުން ތިމާވެށްޓަށް ކުރިމަތިވެފައިވާ ނުރައްކާތަކާ ބެހޭގޮތުން މުޖުތަމަޢުގެ ހޭލުންތެރިކަން އިތުރުކުރެއެވެ.

2. ޢަމަލީ ބައިވެރިވުން އިތުރުކުރުން: ގަޑިއިރަކަށް ބޮކިތައް ނިއްވާލުމަކީ ކުޑަ ޢަމަލެއް ކަމުގައިވިޔަސް، އޭގެ ސަބަބުން ތިމާވެށި ރައްކާތެރިކުރުމުގެ މުހިންމުކަމާމެދު ވިސްނުމަށް މަގުފަހިވެއެވެ.

3. ބައިނަލްއަޤްވާމީ އެއްބައިވަންތަކަން: ދުނިޔޭގެ އެކި ކަންކޮޅުތަކުގައިވާ މީހުން އެއް މަޤްޞަދެއްގައި އެއްވުމުން ގްލޯބަލް އެއްބައިވަންތަކަން ކުރިއެރުވެއެވެ.

4. ދެމެހެއްޓެނިވި ޙައްލުތައް ހޯދުން: މި ހަރަކާތުން ހަކަތަ ޚަރަދުކުޑަ ގޮތްތަކާއި ދެމެހެއްޓެނިވި އާދަތައް އާލާކުރުމަށް ބާރުއަޅައެވެ.

ވީމާ، “އާރތު އަވަރ 2025” ގައި ބައިވެރިވުމަކީ ތިމާވެށި ރައްކާތެރިކުރުމަށް އަޅުގަނޑުމެންގެ ވަގުތާއި ހަކަތަ ހޭދަކުރުމުގެ މުހިންމު ފުރުޞަތެކެވެ. މި ހަރަކާތުގައި ބައިވެރިވެ، ދެމެހެއްޓެނިވި މުސްތަޤުބަލެއް ބިނާކުރުމަށް އެންމެން އެކުގައި މަސައްކަތްކުރުމަކީ ވަރަށް މުހިންމު ކަމެކެވެ.