ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމަށް ކުރީގެ ކޮމިޝަނަރ އޮފް ޕޮލިސް، ރިޓަޔަރޑް އަޙްމަދު ފަޞީޙް އައްޔަންކުރައްވައިފި
ރައީސުލްޖުމްހޫރިއްޔާ ރިއްޔާ ޑރ. މުޙައްމަދު މުޢިއްޒު ވަނީ ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމަށް ކުރީގެ ކޮމިޝަނަރ އޮފް ޕޮލިސް، ރިޓަޔަރޑް އަޙްމަދު ފަޞީޙް އައްޔަންކުރައްވާފައެވެ. މި މަޤާމަށް ފަޞީޙް އައްޔަންކުރައްވާފައިވަނީ ސްޓޭޓް މިނިސްޓަރގެ ފެންވަރުގައެވެ.
މި އައްޔަންކުރެއްވުމުގެ ކުރިން، އެ މަޤާމުގައި ހުންނެވި މުޙައްމަދު ޝަމްޢާން ވަޙީދު ވަނީ މަޤާމުން ވަކިކުރައްވާފައެވެ. ނަމަވެސް، ޝަމްޢާން މަޤާމުން ވަކިކުރެއްވި ސަބަބެއް ސަރުކާރުން މިހާތަނަށް ރަސްމީކޮށް ހާމަކުރައްވާފައެއް ނުވެއެވެ.
ފަޞީޙަކީ ޔޫ.އެސް ޑިޕާޓްމަންޓް އޮފް ޖަސްޓިސްގެ އެފް.ބީ.އައި ނޭޝަނަލް އެކަޑަމީން އެފް.ބީ.އައި ޖެނެރަލް ކޯސް އޮފް އިންސްޓްރަކްޝަން ފުރިހަމަކުރައްވާފައިވާ ބޭފުޅެކެވެ. އަދި އޭނާ ވަނީ މޯލްޑިވްސް ޕޮލިސް ސަރވިސްއަށް ދިގު މުއްދަތަކަށް ޚިދުމަތްކުރައްވައި، ޕޮލިސް ބޯޑުގައިވެސް މަސައްކަތްކުރައްވާފައެވެ.
މި ބަދަލު އައިސްފައިވަނީ މޯލްޑިވްސް އިމިގްރޭޝަންގެ ބައެއް މުވައްޒަފުން، މަޤާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާކަމުގެ ތުހުމަތުތަކެއް ކުރެވެމުންދާ ދަނޑިވަޅެއްގައެވެ. މި މައްސަލައާ ގުޅިގެން މޯލްޑިވްސް ޕޮލިސް ސަރވިސްއިން ވަނީ ތަޙްޤީޤެއް ފަށާފައެވެ. އަދި މިހާތަނަށް 3 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައިކަމަށް ފުލުހުން މަޢުލޫމާތު ދެއްވާފައިވެއެވެ.
ފުލުހުން ވިދާޅުވެފައިވަނީ ތަޙްޤީޤު ކުރިއަށްދާ މިންވަރަކުން އިތުރު މަޢުލޫމާތު ހާމަކުރަމުން ގެންދަވާނެ ކަމަށެވެ.
