މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ނައިބު ރައީސް މުހައްމަދު ފަޒީން، އެ ކޮމިޝަންގެ މެންބަރުކަމުން އިސްތިއުފާދެއްވައިފިއެވެ.

ފަޒީން އިސްތިއުފާދެއްވާފައި މިވަނީ، ބްރޯޑްކޮމްގެ މެންބަރުކަމުން އޭނާ ވަކިކުރުމުގެ މައްސަލަ ރައްޔިތުންގެ މަޖިލީހުގެ ކޮމިޓީއަށް ފޮނުވާފައިވަނިކޮށެވެ. ބްރޯޑްކޮމްގެ އަންހެން މުވައްޒަފަކަށް، ފަޒީން ޖިންސީ ފުރައްސާރަކުރި ކަމަށް ތުހުމަތުވާ މައްސަލައެއް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވެސް ވަނީ ބަލައިފައެވެ.

އިސްތިއުފާދެއްވުމަށް ފަޒީން މިއަދު ފޮނުއްވި ސިޓީގައި ވިދާޅުވީ މަގާމުން އިސްތިއުފާދެއްވުމަށް ނިންމެވީ ވަކި ފަރާތަކަށް ނުޖެހި މިނިވަންކަމާއެކު ކޮމިޝަނުގެ މެންބަރުކަމުގެ ޒިންމާ އުފުލުމަކީ މި ހިނދަށް ކުރެވެން ނެތް ކަމެއް ކަމަށް ގަބޫލުކެރެވޭތީ ކަމަށެވެ.

ފަޒީން ވަނީ އޭނާއަށް ތުހުމަތުވާ ޖިންސީ ފުރައްސާރައިގެ މައްސަލަ ވެސް ދޮގުކުރައްވައިފައެވެ. އެކަމާ ގުޅޭ ބަޔާނުގައި ފަޒީން ވިދާޅުވީ އެ މައްސަލަ ކޮމިޝަނުގެ ކޮމިޓީއަކުންނާއި މަޖިލީހުގެ މިނިވަން މުއައްސަސާތަކުގެ ކޮމިޓީ އާއި ފުލުހުން ތަހުގީގުކުރުމުން ވެސް ބުނި ބުނުން ފިޔަވައި ގުޅުވައިލެވޭނެ އިތުރު އެއްވެސް ހެއްކަކާއި ގަރީނާއެއް މިހާތަނަށް ދެއްކިފައިނުވާ ކަމަށެވެ.

ބްރޯޑްކޮމްގެ މެންބަރުކަމަށް ފަޒީން އައްޔަންކުރެއްވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2021 ވަނަ އަހަރުއެވެ. އޭގެ ކުރިން އޭނާ ވަނީ ރާއްޖެ ޓީވީ އާއި ޗެނަލް ނިއުސް މޯލްޑިވްސް (ސީއެންއެމް)ގައި ނޫސްވެރިއެއްގެ ގޮތުގައި މަސައްކަތްކުރައްވައިފައެވެ.