ރައީސް ޑރ. މުހައްމަދު މުއިއްޒުގެ ސަރުކާރުން މިއަހަރުގެ ރޯދަމަހުގެ ހަދިޔާގެ ގޮތުގައި ރާއްޖޭގެ ހުރިހާ ގޭބިސީއަކަށް ބަހަމުންދާ މަސްދަޅުކޭސް ލައްކައަކަށް ވުރެ ގިނަ ގޭބިސީއަށް ބަހައިފިއެވެ.

ލޯކަލް ގަވާމެންޓް މިނިސްޓަރު އާދަމް ޝަރީފް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ މުޅި ރާއްޖޭގެ 110،127 ގޭބީސީއަކަށް މަސްދަޅު ކޭސް ބަހައިނިމިފައިވާކަމަށެވެ. މީގެ ތެރޭގައި މާލޭގެ 49،416 ގޭބީސީއާއި އަތޮޅުތެރޭގެ 60،711 ގޭބީސީ ހިމެނޭ ކަމަށް މިނިސްޓަރު ވިދާޅުވިއެވެ.

މާލެ ސަރަހައްދުގައި މަސްދަޅު ކޭސްތައް ބެހުމުގެ މަސައްކަތް ކުރިއަށް ގެންދަނީ އެ މިނިސްޓްރީގެ ދަށުންނެވެ. އަދި އަތޮޅުތެރޭގައި މި މަސައްކަތް ކުރިއަށްދަނީ ރަށު ކައުންސިލްތަކުންނެވެ.

މާލޭގައި މިހާރު މަސް ދަޅު ކޭސް ބަހަމުން ދަނީ ހަމައެކަނި މިފްކޯގެ ފިހާރަތަކުންނެވެ. މިދިޔަ އަހަރުގެ ރޯދަމަހު ސަރުކާރުން ވަނީ 82،000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދީފައެވެ.