މެލޭޝިޔާގައި ގެއްލިގެން ހޯދަމުންދިޔަ ދިވެހި ޒުވާނާ، އަހުމަދު އުސެއިދު (24)، އޭނާގެ އާއިލާއާ އެ ގައުމުގެ ފުލުހުން މިއަދު ހަވާލުކޮށްފިއެވެ. މިދިޔަ އާދިއްތަ ދުވަހުން ފެށިގެން ގެއްލިފައިވާ ކަމަށް ބެލެވުނު އުސެއިދު ފެނުނީ ހޮޓަލަކަށް “އަރާމު ކޮށްލަން” ދިޔަ ތަނުން ހިނގި ހާދިސާއަކާ ގުޅިގެންނެވެ.

މެލޭޝިޔާގެ ސަންވޭ ސަރަހައްދުގައި ދިރިއުޅޭ އުސެއިދު ހޯދުމަށް ގިނަ މަސައްކަތްތަކެއް ކުރެވުނެވެ. އުސެއިދުގެ ބައްޕަ އަދި ރައްޔިތުންގެ ހާއްސަ މަޖިލިހުގެ ބ. އަތޮޅު ދާއިރާގެ ކުރީގެ މެމްބަރު އިބްރާހިމް އަފީފު ވިދާޅުވި ގޮތުގައި، އުސެއިދު ހޮޓަލަކަށް އަރާމު ކުރަން ދިޔައިރު “ގެސްޓަކަށް ކަމެއް ކުރަން” އުޅޭ ކަމަށް ހީވެގެން އެ ހޮޓަލުން ފުލުހުންނަށް ރިޕޯޓް ކުރިއެވެ.

“އެހެންވެ، އުސެއިދު ފުލުހުންގެ ކަސްޓަޑީގައި ގެންދިޔައީ. އެ ހިސާބުން އަޅުގަނޑުމެންނަށް ފުލުހުން އަންގައިގެން ގޮސް އުސެއިދާ މިއަދު ހަވާލުވެއްޖައިން. އުސެއިދާ ބައްދަލުވެއްޖެ. ހާލު ވެސް ރަނގަޅު،” އަފީފު ވިދާޅުވިއެވެ.

މޮނާޝް ޔުނިވާސިޓީގައި ކިޔަވާ އުސެއިދު ބޮޑަށް އުޅުނީ “އެކަނިވެރިވެގެން” ކަމަށް އޭނާގެ ބައްޕަ ފާހަގަކުރެއްވިއެވެ. އުސެއިދު މެލޭޝިޔާގައި ހުންނަ ރާއްޖޭގެ އެމްބަސީއަށް ވެސް ދިޔަ ކަމަށާއި، ނަމަވެސް އެތަން ބަންދުކޮށްފައި ހުރުމުން އެއްވެސް މީހަކާ ބައްދަލު ނުވި ކަމަށް އަފީފު ވިދާޅުވިއެވެ.

އުސެއިދު ހޯދުމަށް ކުރި މަސައްކަތުން ސީސީޓީވީ ފުޓޭޖުތަކުންނާއި ބައެއް މީހުން ދިން މައުލޫމާތުތަކުން އުސައިދު އާދިއްތަ ދުވަހުގެ ހަވީރު 4 ޖެހިއިރު އެމްބަސީ އަށް ދިޔަ ކަން އެނގުނު ކަމަށް ބައްޕަ ވިދާޅުވެފައިވެއެވެ.

މި ހާދިސާއާ ގުޅިގެން އުސެއިދުގެ އާއިލާއިން ވަނީ ޝުކުރު އަދާކޮށްފައެވެ. އަދި އުސެއިދު މިހާރު ހުރީ ރަނގަޅު ހާލުގައި ކަމަށް އާއިލާއިން ބުނެފައިވެއެވެ.