ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވަނީ މަޖިލީހުގައި ކޮންމެ ދުވަހަކު ކުރެވޭ އެންމެހައި މަސައްކަތްތަކުގެ ތަފްސީލު، އެދުވަހެއްގެ ޖަލްސާގައި އިޢުލާންކުރެއްވުމަށް ނިންމަވާފައެވެ. މި ނިންމެވުމަކީ މަޖިލީހުގެ މެންބަރުން ޖަލްސާތަކަށް ހާޒިރުނުވެ މުސާރަ ނަންގަވާކަމަށް ދެކެވެމުންދާ ވާހަކަތަކާ ގުޅިގެން އިއްޔެގެ ޖަލްސާގައި އިޢުލާންކުރެއްވި ނިންމެވުމެކެވެ.
މަޖިލީހުގެ ރައީސް ވިދާޅުވި ގޮތުގައި، މަޖިލީހުގެ މަސައްކަތްތައް ކުރިއަށްދާ ގޮތް ރައްޔިތުންނަށް ހާމަވެފައި އޮތުމަކީ ކޮންމެހެން މުހިންމު ކަމެކެވެ. އަދި މިއީ މަޖިލީހުގެ ރިޔާސަތުގެ އަސާސީ ޒިންމާއެއް ކަމުގައިވެސް އެމަނިކުފާނު ފާހަގަކުރެއްވިއެވެ.
މަޖިލީހުގެ ޖަލްސާތައް ލައިވްކޮށް ފޮނުވާއިރު، ތަޅުމުގައި މަދު މެންބަރުންތަކެއް ފެނުމަކީ ޖަލްސާތަކަށް މެންބަރުން ހާޒިރުނުވާކަމަށް ދޭހަވެދާނެ ކަމެއްކަމުގައި ވިދާޅުވިއެވެ. ނަމަވެސް ޖަލްސާތައް ކުރިއަށްދާއިރުވެސް ގިނަ މެންބަރުން ކޮމިޓީތަކުގެ މަސައްކަތްތަކުގައި ހަރަކާތްތެރިވަމުންދާކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ރަމަޟާން މަހުގެ ބަރަކާތްތައް އެންމެ ފުރިހަމަ ގޮތުގައި ހޯއްދެވުމަށް މަޖިލީހުގެ ރައީސް ވަނީ މެންބަރުންނަށް ނަސޭހަތްތެރިވެވަޑައިގެންފައެވެ.
