ރައީސް ޑރ. މުޙައްމަދު މުޢިއްޒު މިރޭ ދެއްވި ބަޔާނުގައި، ކުރީގެ ސަރުކާރުން ފްލެޓް ލިބޭނެކަމަށް ވައުދުވެފައިވާ އެއްވެސް ފަރާތަކަށް ލިބިފައިވާ ފްލެޓެއް އަތުލައްވާނެކަމަށް ވިދާޅުނުވާ ކަމަށާއި، އެ ވައުދުގެ މަތީގައި މިހާރުވެސް އަދި ކުރިމަގުގައިވެސް ދެމިހުންނަވާނެ ކަމަށް އިތުބާރު ދެއްވައިފިއެވެ.
މީގެ ކުރިން، ޑިސެމްބަރު މަހު ބޭއްވުނު ނޫސްވެރިންގެ ބައްދަލުވުމެއްގައި ރައީސް ވަނީ، ކުރީގެ ސަރުކާރުން ހިންގި ބިންވެރިޔާއާއި ގެދޮރުވެރިޔާ ސްކީމުގެ ދަށުން ފްލެޓް ނުވަތަ ގޯތި ލިބޭނެކަމަށް ލިސްޓުގައި ހިމެނިފައިވާ ހުރިހާ ފަރާތްތަކަށް، އެ ތަންތަން ލިބޭނެކަމުގެ ޔަޤީންކަން ދެއްވާފައެވެ. މިއީ ރަސްމީ ލިޔުން ލިބިފައިނުވާ ފަރާތްތައްވެސް ހިމެނޭ ގޮތަށެވެ.
އިއްޒުއްދީން ފާލަން މަރާމާތުކޮށް އަލުން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މިއަދު ޢާންމުކުރެވުނު ގެދޮރުވެރިޔާ ސްކީމުގެ ފްލެޓް ލިބޭ ފަރާތްތަކުގެ ލިސްޓަކީ، އެންޓި-ކޮރަޕްޝަން ކޮމިޝަން (އޭސީސީ) އިން ފާހަގަކުރެއްވި ކަންކަމަށް ރިޢާޔަތްކޮށް، އަދި ކުރީގެ ސަރުކާރުން އިޢުލާންކުރި ޝަރުޠުތަކާއި ޕޮއިންޓް ދިނުމުގެ އުސޫލުތަކަށް ބިނާކޮށް އެކުލަވާލެވިފައިވާ ލިސްޓެއްކަމަށެވެ.
ރައީސް އިތުރަށް ވިދާޅުވީ، “އަޅުގަނޑު ވަޢުދުވެފައިވަނީ އެއްވެސް ރައްޔިތަކަށް ލިބިފައިވާ ގޯއްޗެއް ނުވަތަ ފްލެޓެއް އަތުނުލާނެކަމަށެވެ. މި ވަޢުދުގައި އޭރުވެސް، މިހާރުވެސް އަދި ކުރިއަށް އޮތްތަނުގައިވެސް ސާބިތުވެ ހުންނާނަމެވެ. އައު ލިސްޓު ނެރުނުއިރު، ކުރީގެ ސަރުކާރުން ނެރުނު ލިސްޓުން ބައެއް ފަރާތްތައް އުނިވެފައިވާކަން ފާހަގަކުރެވެއެވެ. މިކަމުގެ ސަބަބުތައް އެ ފަރާތްތަކުގެ މަޢުލޫމާތުތަކުގެ ތެރޭގައި ހިމަނާފައިވާނެއެވެ.
ކިޔުންތެރިންގެ ހިޔާލު