ޖުޑީޝަލް ސަރވިސް ކޮމިޝަން (ޖޭއެސްސީ) އިން ސުޕްރީމް ކޯޓުގެ ދެ ފަނޑިޔާރެއްގެ ސުލޫކީ މައްސަލަ ބެލުމަށް ފަށައިފިއެވެ. މި ދެ ފަނޑިޔާރުންނަކީ މިހާރު ސަސްޕެންޝަނުގައި ތިއްބެވި ފަނޑިޔާރު ހުސްނުއް ސުއޫދާއި ފަނޑިޔާރު އަޒްމިރަލްދާ ޒާހިރެވެ.
މަޢުލޫމާތު ލިބިފައިވާ ގޮތުގައި، ފަނޑިޔާރު ސުއޫދުގެ މައްސަލަ ބެލުމަށް ފަށާފައިވަނީ ދެ އަހަރު ކުރިން ހިނގި ޝަރީޢަތެއްގެ ދެ އަޑުއެހުމެއްގައި އެ ފަނޑިޔާރު ކުރެއްވި ސުވާލުތަކަކާ ގުޅިގެންނެވެ. ފަނޑިޔާރު އަޒްމިރަލްދާގެ މައްސަލައެއް ބަލަމުންދާކަން ޔަޤީންވެފައިވީ ނަމަވެސް، އެ މައްސަލައިގެ ތަފްސީލު އަދި ހާމަވެފައެއް ނުވެއެވެ.
މި ދެ ފަނޑިޔާރުންނާއި އިތުރު އެއް ފަނޑިޔާރެއް ކަމުގައިވާ ފަނޑިޔާރު މަހާޒް އަލީ ޒާހިރު ވެސް ވަނީ ސަސްޕެންޑް ކުރެވިފައެވެ. ޖޭއެސްސީން މަޢުލޫމާތު ދެއްވާފައިވާ ގޮތުގައި، މި ފަނޑިޔާރުން ސަސްޕެންޑް ކުރެވިފައިވަނީ އެންޓި-ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާ ގުޅިގެންނެވެ.
އޭސީސީން ނެރުއްވާފައިވާ ނޫސްބަޔާނެއްގައި ވިދާޅުވެފައިވަނީ، ކޮރަޕްޝަންގެ ޢަމަލެއް ހިންގާކަމުގެ ތުހުމަތު ކުރެވޭ މައްސަލައެއް ހުށަހެޅިއްޖެނަމަ، އެއްވެސް ފަރާތެއް އިސްތިސްނާ ނުކޮށް އެ މައްސަލައެއް ތަޙުޤީޤުކުރުމަކީ އެ ކޮމިޝަނުގެ ޤާނޫނީ ޒިންމާއެއް ކަމަށެވެ. އަދި މިފަދަ މައްސަލަތައް ބެލުމުގައި ޖިނާއީ ޢަދުލުގެ ނިޒާމުގެ ތެރެއިން ކޮމިޝަނަށް ލިބިދީފައިވާ ބާރުތަކުގެ ދަށުން މައްސަލަތައް ބަލަމުން ގެންދާނެކަމަށް އެ ކޮމިޝަނުން ކަށަވަރުކޮށްދެއްވާފައިވެއެވެ.
ކިޔުންތެރިންގެ ހިޔާލު