އެމްޕީއެލްއިން ރަމަޟާން މަހަށް ތައްޔާރުވުމުގެ ގޮތުން ވަރަށް މުހިންމު އިންތިޒާމުތަކެއް ހަމަޖައްސާފައިވާ ކަމަށް އިޢުލާނުކޮށްފިއެވެ. މި އިންތިޒާމުތަކުގެ ތެރޭގައި މުދާ ދޫކުރުމުގެ ވަގުތު އިތުރުކުރުމާއި، އިތުރު މުވައްޒަފުން ގެނައުމާއި، އަދި ޖާގައިގެ ދަތިކަން ޙައްލުކުރުމަށް އަޅާ ފިޔަވަޅުތައް ހިމެނެއެވެ.

އެމްޕީއެލްގެ ހެޑް އޮފް ޕޯޓް އޮޕަރޭޝަން ޑިޕާޓްމަންޓް، އިލްޔާސް މުޙައްމަދު ވިދާޅުވި ގޮތުގައި، މާލޭ ޕޯޓަށް ދިމާވެފައިވާ އެންމެ ބޮޑު ގޮންޖެހުމަކީ ޖާގައިގެ ދަތިކަމެވެ. ނަމަވެސް، މިހާރު އެކަމަށް ވަރަށް ބޮޑު ލުޔެއް ލިބިފައިވާ ކަމަށް އޭނާ ފާހަގަކުރެއްވިއެވެ. ކުރިން 3,600 ކޮންޓެއިނަރު ބެހެއްޓޭ ސަރަޙައްދުގައި މިހާރު 5,000 އަށްވުރެ ގިނަ ކޮންޓެއިނަރު ބެހެއްޓޭ މިންވަރަށް ޖާގަ އިތުރުކުރެވިފައިވާ ކަމަށް އޭނާ ވިދާޅުވިއެވެ.

އިތުރު ޖާގަ ހޯދުމަށްޓަކައި ތިލަފުށީގައި ހުސް ކޮންޓެއިނަރު ބެހެއްޓުމަށް ޓާމިނަލެއް ތަރައްޤީކުރުމުގެ މަސައްކަތް ކުރިއަށްދާ ކަމަށާއި، ކުރިއަށް އޮތް ދެ މަސްދުވަހުގެ ތެރޭގައި އެ މަސައްކަތް ނިމޭނެ ކަމަށް ލަފާކުރެވޭ ކަމަށްވެސް އިލްޔާސް ވިދާޅުވިއެވެ. މީގެ އިތުރުން، ރަމަޟާން މަހަށް ތައްޔާރުވުމުގެ ގޮތުން އެމްޕީއެލްއިން ވަގުތީ މުވައްޒަފުން އިތުރުކޮށްފައިވާ ކަމަށްވެސް އޭނާ ހާމަކުރެއްވިއެވެ.

ރަމަޟާން މަހުގައި މުދާ ދޫކުރުމުގެ މަސައްކަތް ކުރިއަށްދާނެ ގޮތުގެ ތަފްޞީލު އެމްޕީއެލްއިން ހާމަކޮށްފައިވެއެވެ. އެގޮތުން:

– ޑެލިވަރީ އޯޑަރު އެސައިން ކުރުން ހޮނިހިރުން ފެށިގެން ބުރާސްފަތި ދުވަހަށް ދުވާލު 9:15 އިން 13:00 އަ އިން 13:00 އަށް އަދި ރޭގަނޑު 21:15 އިން 22:30 އަށް ކުރިއަށްދާނެއެވެ.
– އާންމު ޚިދުމަތުގެ ދަށުން ކަނޑާ ސަރަޙައްދަށް ގެންދެވޭނެ ކޮންޓެއިނަރުގެ އަދަދު ހޮނިހިރުން ފެށިގެން ބުރާސްފަތި ދުވަހަށް 150 ޓީއީޔޫސް އަދި ހުކުރު ދުވަހަށް 100 ޓީއީޔޫސް އަށް ކަނޑައަޅާފައިވެއެވެ.
– މާލެ ކޮމާޝަލް ހާބަރުން ކްލިއާ ކުރާ ހުރިހާ ބާވަތެއްގެ މުދާވެސް ދޫކުރުމަށް ހަމަޖެހިފައިވަނީ ހުކުރު ދުވަސް ފިޔަވައި ޕޯޓް މަސައްކަތްކުރާ ހުރިހާ ދުވަހެއްގެ ހެނދުނު 9:15 އިން 16:00 އަށް އަދި ރޭގަނޑު 21:15 އިން 1:30 އާ ހަމައަށެވެ.
– ހުޅުމާލެ ޓާމިނަލްއިން ވެސް މި ގަޑިތަކާ އެއްގޮތަށް ޚިދުމަތް ދެމުންދާނެއެވެ.