އައްޑޫ ސިޓީ ހިތަދޫގައި ހުންނަ “ގާލެންޑް” ނަމަކަށް ކިޔާ ގޭގައި އަލިފާނުގެ ހާދިސާއެއް ހިނގައިފިއެވެ. މި ހާދިސާ ހިނގާފައިވަނީ މިއަދު ފަތިހު 05:11 ހާއިރުގައެވެ.
އެމްއެންޑީއެފްގެ ސަދަން އޭރިއާ ކޮމާންޑުގެ ހިތަދޫ ފަޔަރ ސްޓޭޝަނަށް މި ހާދިސާގެ މަޢުލޫމާތު ލިބުމާއެކު، ވަގުތުން ފަޔަރފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައިވެއެވެ. އެމްއެންޑީއެފްގެ ފަރާތުން މަޢުލޫމާތު ދެއްވިގޮތުގައި، ފަޔަރފައިޓަރުންގެ ހަލުވި އަދި ފަންނީ މަސައްކަތުގެ ސަބަބުން އަލިފާން މުޅިން ނިއްވާލެވިފައިވަނީ ހެނދުނު 08:05 ހާއިރުގައެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާކަން ފާހަގަކޮށްލެވެއެވެ. ނަމަވެސް، މީހުން ދިރިއުޅެމުން އައި މި ގެ ވަނީ ބޭނުން ނުކުރެވޭ މިންވަރަށް އަނދާ ހަލާކުވެފައެވެ.
މި ހާދިސާއާ ގުޅިގެން އިތުރު މަޢުލޫމާތު ލިބުމުން އާންމުކުރެވޭނެ ވާހަކަ ކަމާބެހޭ ފަރާތްތަކުން ވަނީ އަންގަވާފައެވެ.
