ސަރުކާރުގެ ވުޒާރާތަކުން ކުރަމުންދާ މަސައްކަތްތަކާ ބެހޭ މަޢުލޫމާތު ހިއްސާކޮށް، ރައްޔިތުންގެ ސުވާލުތަކަށް ޖަވާބުދިނުމަށް ބާއްވާ “އަހާ” ވަޒީރުންގެ ހަތަރުވަނަ ފޯރަމް މިރޭ 9:00 ގައި ބޭއްވުމަށް ވަނީ ހަމަޖެހިފައެވެ.
މި ފޯރަމްގައި ފަސް ވަޒީރުން ބައިވެރިވެ ވަޑައިގަންނަވާނެ ކަމަށް ރައީސް އޮފީހުން މަޢުލޫމާތު ދެއްވާފައިވެއެވެ. އެއީ އިޖްތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. އައިޝަތު ޝިހާމް، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ ވަޒީރު ޑރ. ޢަލީ ހައިދަރު އަޙުމަދު، އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު، އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ވަޒީރު މުޙައްމަދު ސަޢީދު، އަދި ފަތުރުވެރިކަމާއި ތިމާވެއްޓާ ބެހޭ ވުޒާރާގެ ވަޒީރު ޠާރިޤު އިބްރާހިމްއެވެ.
ދެ ގަޑިއިރަށް ކުރިއަށްދާނެ މި ފޯރަމްގައި އާންމު ރައްޔިތުންނަށް ސުވާލު ކުރުމުގެ ފުރުޞަތު ހުޅުވާލާފައިވެއެވެ. ފޯރަމް އޮންނަ ތަނަށް ގޮސްގެންނާއި، ފޯނުން ގުޅައިގެންނާއި، އެސްއެމްއެސް އަދި ސޯޝަލް މީޑިއާ މެދުވެރިކޮށް ސުވާލު ކުރެވޭނެއެވެ. އަދި ޕީއެސްއެމް އެއަރ އެޕް މެދުވެރިކޮށްވެސް ސުވާލު ކުރެވޭނެ އިންތިޒާމް ހަމަޖައްސާފައިވާ ކަމަށް ރައީސް އޮފީހުން ބުނެފައިވެއެވެ.
“އަހާ” ފޯރަމްގެ ނަމުގައި ކުރިއަށްގެންދާ މި ސިލްސިލާގެ ފުރަތަމަ ފޯރަމް ބޭއްވިފައިވަނީ މިދިޔަ އަހަރުގެ ޖަނަވަރީ 25 ވަނަ ދުވަހުއެވެ. މި ފޯރަމްތަކުގެ މަޤްޞަދަކީ ސަރުކާރުން ކުރަމުންދާ މަސައްކަތްތަކާ ގުޅޭގޮތުން ރައްޔިތުންނަށް މަޢުލޫމާތު ދިނުމާއި، ރައްޔިތުންގެ ސުވާލުތަކަށް ސީދާ ވަޒީރުން ޖަވާބުދެއްވުމެވެ.
ވަޒީރުންގެ ފޯރަމްގެ އިތުރުން، ރައީސުލްޖުމްހޫރިއްޔާ މުޙައްމަދު މުޢިއްޒު ބައިވެރިވެވަޑައިގަންނަވާ ޚާއްޞަ ފޯރަމެއްވެސް ސަރުކާރުން އަންނަނީ ބާއްވަމުންނެވެ. މިއީވެސް އާންމުންނަށް އެކި ދާއިރާތަކުން ސުވާލުކުރެވޭގޮތަށް ހުޅުވާލެވިފައިވާ ފޯރަމެކެވެ.
މިރޭގެ ފޯރަމަށް ސުވާލު ފޮނުވަން ބޭނުންވާ ފަރާތްތަކުން AH ޖެއްސުމަށްފަހު ހުސްތަންކޮޅެއް ދޫކޮށް، ސުވާލު ލިޔުމަށްފަހު 300 އަށް އެސްއެމްއެސް ކުރެވިދާނެއެވެ.
ކިޔުންތެރިންގެ ހިޔާލު