މިނިސްޓަރ އޮފް ހެލްތު ޢަބްދުﷲ ނާޒިމް ވިދާޅުވެފައިވަނީ މި ސަރުކާރުން އާސަންދައިގެ އެއްވެސް ޚިދުމަތެއް ހުއްޓާލާފައި ނުވާ ކަމަށެވެ. އޭގެ ބަދަލުގައި އިތުރު ޚިދުމަތްތަކެއް ތަޢާރަފުކޮށްފައިވާ ކަމަށް އެމަނިކުފާނު ފާހަގަކުރެއްވިއެވެ.
އެމްއެމްޓީވީގެ “ބޮޑު ޚަބަރު” ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ، މި ސަރުކާރުން އާސަންދައިގެ ދަށުން ފޯރުކޮށްދޭ އައު ޚިދުމަތްތަކަކީ ޚަރަދު ބޮޑު ޚިދުމަތްތަކެއް ކަމަށެވެ. މިގޮތުން އައި.ޖީ.އެމް.އެޗްގައި ޤާއިމުކުރެވުނު ދަރިމައިވުމަށް އެހީވެދޭ ކްލިނިކާއި، އެއަރ އެމްބިއުލަންސްގެ ޚިދުމަތް ހަރުދަނާކުރެވުނު ކަން އެމަނިކުފާނު ފާހަގަކުރެއްވިއެވެ.
މީގެ އިތުރުން، ކުރީގެ ސަރުކާރުން އަޅާނުލުމުގެ ސަބަބުން ފަހަތަށް ގޮސްފައިވާ ބައެއް ކަންކަން މި ސަރުކާރުން އިސްލާޙުކޮށް، ހަރުދަނާ ނިޒާމެއްގެ ދަށުން ކުރިއަށް ގެންދަވަމުންދާ ކަމަށް މިނިސްޓަރު ވިދާޅުވިއެވެ. މިގޮތުން ތެލެސީމިއާ ކުދިންގެ ފަރުވާއަށް އަލުން އަހައްމިއްޔަތުކަން ދެއްވާ، ފާއިތުވި އަހަރު 14 ކުއްޖަކު ދައުލަތުގެ ޚަރަދުގައި ބޯން މެރޯ ޓްރާންސްޕްލާންޓަށް ފޮނުވިފައިވާ ކަމަށް އެމަނިކުފާނު ވިދާޅުވިއެވެ.
ބޭސް ލިބުމުގައި ދިމާވެފައިވާ ދަތިތަކާ ގުޅޭގޮތުން މިނިސްޓަރު ވިދާޅުވީ، މި މައްސަލަ ޙައްލުކުރުމަށް ކަމާބެހޭ އެންމެހައި ފަރާތްތަކާއެކު މަޝްވަރާކުރަމުންދާ ކަމަށާއި، މި މަޝްވަރާތަކުގެ ސަބަބުން މި މައްސަލައަށް ދާއިމީ ޙައްލެއް ލިބިގެންދާނެ ކަމަށް އުންމީދުކުރައްވާ ކަމަށެވެ.
އަދި ޞިއްޙީ ނިޒާމަށް މިހާ ބޮޑު އިންވެސްޓްމަންޓެއް ކުރެވި، ނިޒާމަށް މިފަދަ ބޮޑު ބަދަލެއް ގެނެވުނު ދުވަސްވަރެއް ރާއްޖޭގެ ތާރީޚުގައި މީގެ ކުރިން ނާންނަ ކަމަށް މިނިސްޓަރު ފާހަގަކުރެއްވިއެވެ. މީގެ ތެރޭގައި ދުންފަތުގެ އިސްތިޢުމާލު ހުއްޓުވުމަށް އެޅުނު ފިޔަވަޅުތަކާއި، ވޭޕް މަނާކުރުމާއި، ކާބޯތަކެއްޗާބެހޭ ޤާނޫނެއް ފުރަތަމަ ފަހަރަށް ވުޖޫދަށް ގެނައުން ހިމެނޭ ކަމަށް އެމަނިކުފާނު ވިދާޅުވިއެވެ.
