އެއް ދުވަހުގެ ބައިނަލްއަގްވާމީ ކްރިކެޓް މެޗެއްގައި އިންޑިޔާ އާއި އިންގްލެންޑް ބައްދަލުކުރި މެޗުން އިންގްލެންޑް ބަލިވެއްޖެ އެވެ. އަހުމަދާބާދުގައި ކުޅުނު މި މެޗުން އިންޑިޔާ މޮޅުވެފައިވަނީ 142 ލަނޑުންނެވެ.

ކުރިއަށް އޮތް ޗެމްޕިއަންސް ޓްރޮފީ އަށް ތައްޔާރުވުމުގެ ގޮތުން މިހާރު ކުޅެމުންދާ މެޗުތަކުގެ ތެރެއިން އިންގްލެންޑް އިން އިންޑިޔާއަށް ކުރަމުންދާ ދަތުރުގައި ކުޅުނު މި މެޗުގައި އިންޑިޔާއިން ވަނީ ފުރަތަމަ ކުޅެން އަރާ ފަންސާސް އޯވަރުގެ ތެރޭގައި 356 ލަނޑު ހަދާފައެވެ. އިންޑިޔާގެ ގިލް ވަނީ 112 ލަނޑު ހަދާފައެވެ.

ޖަވާބުގައި އިންގްލެންޑް ކުޅެން އަރާ 34.2 އޯވަރުގެ ތެރޭގައި އެންމެން ނުބައިވެގެން އެ ޓީމަށް ހެދިފައިވަނީ 214 ލަނޑެވެ. އިންގްލެންޑްގެ ފަރާތުން އާދައިގެ ކުޅުމެއް ފެނިގެން ގޮސްފައިވާ މި މެޗުން އެ ޓީމު ބަލިވެފައިވާއިރު މީގެ ކުރިން އިންޑިޔާ އާއި ދެކޮޅަށް ކުޅުނު އެއް ދުވަހުގެ އިންޓަރނޭޝަނަލް ދެ މެޗުންވެސް އިންގްލެންޑް ވަނީ ބަލިވެފައެވެ.

މި މެޗަށްފަހު އިންގްލެންޑްގެ ކެޕްޓަން ޖޮސް ބަޓްލާރ ބުނެފައިވަނީ އެ ޓީމުން ރަގަޅަށް ކުޅުނު ނަމަވެސް އިންޑިޔާ އެ ޓީމަށްވުރެ މާ މޮޅަށް ކުޅެފައިވާ ކަމަށެވެ. “އަޅުގަނޑުމެން ކުޅުންތެރިންގެ ގޮތުގައި އަމިއްލަ އަށް ރަގަޅު ކުރަން ޖެހޭ ކަންކަން ރަގަޅުކޮށްގެން މިއަށްވުރެ ރަގަޅު ނަތީޖާތަކެއް ހޯދޭނެ,” ބަޓްލާރ ވިދާޅުވިއެވެ.

މި ބަލިވުމާއެކު އިންގްލެންޑްގެ ޓީމަށް ވަނީ ބޮޑު ޕްރެޝަރެއް ކުރިމަތިވެފައެވެ. ކުރިއަށް އޮތް ޗެމްޕިއަންސް ޓްރޮފީގައި ރަނގަޅު ނަތީޖާއެއް ހޯދުމަށް އިންގްލެންޑްގެ ޓީމުން އިތުރަށް މަސައްކަތް ކުރަން ޖެހޭނެ ކަމަށް ކްރިކެޓް ތަޙްލީލްކުރާ ފަރާތްތަކުން ބުނެއެވެ.