ފެނަކަ ކޯޕަރޭޝަންގެ ބެލުމުގެ ދަށުގައި ހުރި އައިސްޕްލާންޓްތައް މިފްކޯއާ ހަވާލުކޮށް އޮޕަރޭޝަނަށް ގެނައުމުގެ މަސައްކަތް ކުރިއަށްދާކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ފެނަކަ ކޯޕަރޭޝަންގެ ދަށުގައި މިހާރު 14 އައިސްޕްލާންޓް ހުރިކަމަށާއި، މި ހުރިހާ އައިސްޕްލާންޓެއް މި މަހުގެ 15 ވަނަ ދުވަހުގެ ކުރިން މިފްކޯއާ ހަވާލުކުރެވޭނެކަމަށް ވަޒީރު ވިދާޅުވިއެވެ.
ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ވަޒީރު މިހެން ވިދާޅުވިއެވެ. އައިސްޕްލާންޓްތައް ފެނަކައާ ހަވާލުކުރުމުން އެ ތަންތަނުގެ އޮޕަރޭޝަން ހުއްޓި، މަސްވެރިންނަށް އައިސް ލިބުމުގައި ދަތިތަކެއް ކުރިމަތިވެފައިވާކަމަށް ވަޒީރު ފާހަގަކުރެއްވިއެވެ.
މީގެ އިތުރުން، މަސްވެރިން އައިސްޕްލާންޓްތަކަށް ބަރޯސާވާ މިންވަރު ކުޑަކުރުމަށްޓަކައި، ސަރުކާރުން ވަނީ ލުއި ލޯނު ސްކީމެއް ތަޢާރަފުކޮށްފައެވެ. މި ސްކީމްގެ ދަށުން 50 ފޫޓަށްވުރެ ބޮޑެތި ދޯނިފަހަރުގައި ލޮނުފެނުން މަސް ފިނިކުރެވޭ ނިޒާމު (އާރު.އެސް.ޑަބްލިއު) ގާއިމުކުރުމަށް ފުރުސަތު ދެވޭނެކަމަށް ވަޒީރު ވިދާޅުވިއެވެ. މި މަޝްރޫޢު ނިމުމުން، މަސްވެރިން އައިސް ހޯދުމަށް ކުރަންޖެހޭ ދިގު ދަތުރުތަކަށް ނިމުމެއް އަންނާނެކަމަށްވެސް ވަޒީރު ފާހަގަކުރެއްވިއެވެ.
ކިޔުންތެރިންގެ ހިޔާލު