ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދުގެ ގެއިން ފެނުނު 1.4 މިލިއަން ރުފިޔާ، ކަމާބެހޭ ފަރާތްތަކުން ބަލަންޖެހޭ ކަންކަން ބެލުމަށްފަހު އަނބުރާ އޭނާއާ ހަވާލުކޮށްފިއެވެ.
މި ފައިސާ ފެނުނީ މިދިޔަ ޑިސެމްބަރު މަހުގެ 24 ވަނަ ދުވަހު، ބިންވެރިޔާ އަދި ގެދޮރުވެރިޔާ ސްކީމާ ގުޅިގެން ކޯޓު އަމުރެއްގެ ދަށުން ފަޒުލްގެ ގެ ބަލައި ފާސްކުރިއިރުއެވެ. ފުލުހުން ވިދާޅުވެފައިވަނީ، މި ފައިސާއާ ގުޅޭގޮތުން ބަލަންޖެހޭ ކަންކަން ބެލުމަށްފަހު، އޭގެ ވެރިފަރާތާ ހަވާލުކޮށްފައިވާ ކަމަށެވެ.
ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމުގެ ތުހުމަތު ފަޒުލްގެ މައްޗަށް ކުރެވެމުންދެއެވެ. މީގެ ތެރޭގައި ފަޒުލްގެ ބޭބެއާއި އިތުރު ބަޔަކަށް ބިންވެރިޔާ ސްކީމްގެ އުސޫލުގެ ބޭރުން ގޯތި ދޫކޮށްފައިވާކަމުގެ ތުހުމަތު ހިމެނެއެވެ. މި މައްސަލައިގެ ތަޙްޤީޤު އެންޓި-ކޮރަޕްޝަން ކޮމިޝަނާއި ދިވެހި ފުލުހުންގެ ޚިދުމަތުން ގުޅިގެން ކުރިއަށް ގެންދެއެވެ.
މި މައްސަލަ ފެންމަތިވުމާ ގުޅިގެން، އެޗްޑީސީގެ ޗެއަރމަން ފިޔަވައި، ފަޒުލް ރަޝީދު ހިމެނޭގޮތަށް ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑް ކުރެވިފައެވެ. އަދި ފަޒުލް ރަޝީދާއި އިތުރު 19 މީހެއްގެ ޕާސްޕޯޓްވެސް ވަނީ ހިފެހެއްޓިފައެވެ. މި ތުހުމަތުތަކާ ގުޅިގެން ފަޒުލް ވަނީ މަޤާމުން އިސްތިއުފާ ދީފައެވެ. އަދި އެޗްޑީސީގެ އިތުރު ބައެއް މުވައްޒަފުންވެސް ވަނީ ވަޒީފާއިން ވަކިކުރެވިފައެވެ.
