ހައިވޭގައި ހިނގި ނުރައްކާތެރި އެކްސިޑެންޓެއްގައި ބަންގްލަދޭޝްގެ ފިރިހެނަކު ނިޔާވުމާ ގުޅިގެން، އެ ހާދިސާއާ ގުޅުންހުރި ކަމަށް ބެލެވޭ 60 އަހަރުގެ ދިވެހި އަންހެނެއްގެ ލައިސަންސް ވަގުތީގޮތުން ހިފެހެއްޓުމަށްފަހު، އޭނާ ދުއްވި އުޅަނދު ބަންދުކޮށްފިއެވެ.
މި ހިތާމަވެރި ހާދިސާ ހިނގާފައިވަނީ މިމަހުގެ 1 ވަނަ ދުވަހުގެ ހެނދުނު 8:19 ހާއިރު، ހުޅުމާލެއިން މާލެއަށް އަންނަ މަގުގައި، ސޯލާ ޕެނަލްތައް ހަރުކުރުމުގެ މަސައްކަތް ކުރިއަށްދާ ސަރަޙައްދުގައެވެ. މަސައްކަތުގެ ސަރަޙައްދު ފާހަގަކޮށް ބަހައްޓާފައިވާ ކޯނެއްގައި ސައިކަލެއް ޖެހުމާ ގުޅިގެން، ބަންގްލަދޭޝްގެ ފިރިހެނެއް މަގުމައްޗަށް ވެއްޓި، ފަހަތުން އައި އެހެން ސައިކަލެއް އޭނާގެ މަތިން ދުއްވާލާފައިވާކަމަށް ވަނީ ފާހަގަކުރެވިފައެވެ.
އެ ހާދިސާގައި އަނިޔާވި ފަރާތަށް އައިޖީއެމްއެޗްގައި ފަރުވާދެމުންދަނިކޮށް، އެދުވަހުގެ 9:05 ހާއިރު ނިޔާވެފައިވާކަމަށް ފުލުހުން މަޢުލޫމާތު ދެއްވާފައިވެއެވެ.
މި ހާދިސާއާ ގުޅިގެން 60 އަހަރުގެ ދިވެހި އަންހެނަކާ ސުވާލުކުރުމަށްފަހު، އޭނާގެ ލައިސަންސް ވަގުތީގޮތުން ހިފަހައްޓައި، އޭނާ ދުއްވި އުޅަނދު ބަންދުކޮށްފައިވާކަމަށް މޯލްޑިވްސް ޕޮލިސް ސަރވިސްއިން ހާމަކުރައްވާފައިވެއެވެ. އަދި މި މައްސަލައިގެ ތަޙްޤީޤު މިހާރު ކުރިއަށްދާކަމަށްވެސް ފުލުހުން ވިދާޅުވެފައިވެއެވެ.
