އެސްޓަން ވިލާއިން މެންޗެސްޓަރ އަށް މާކަސް ރެޝްފޯޑް ސީޒަންގެ ނިޔަލަށް ލޯނަށް ސޮއިކޮށްފިއެވެ. މައުލޫމާތު ލިބިފައިވާގޮތުގައި ވިލާއިން ރެޝްފޯޑްގެ މުސާރައިގެ މަދުވެގެން 75 އިންސައްތަ ދައްކާނެ އަދި މިއަދަދު 90 އިންސައްތައަށް އިތުރުވެދާނެ ކަމަށްވެއެވެ. މި ބަދަލު އައިސްފައިވަނީ ޖޮން ޑުރާން އަލް ނަސްރަށް ދިޔުމާ ގުޅިގެންނެއެވެ.
“މި ލޯން ޑީލް ވުޖޫދަށް ގެނައީތީ މެންޗެސްޓަރ ޔުނައިޓެޑްއާއި އެސްޓަން ވިލާއަށް ޝުކުރު އަދާކުރަން,” ރެޝްފޯޑް ބުންޏެވެ.
“އަހަރެންނަށް ޝައުގުވެރިވެ ގުޅުމަށް މަދު ކްލަބްތަކެއް އައި. އެކަމަކު އެސްޓަން ވިލާއަކީ ވަރަށް ފަސޭހަ ނިންމުމެއް – މި ސީޒަންގައި އެސްޓަން ވިލާ ކުޅެމުންދާ ގޮތާއި މެނޭޖަރުގެ އަމާޒުތަކަށް އަހަރެން ވަރަށް އިޙްތިރާމްކުރަން އަދި ހުރީ އަހަރެންވެސް އެެދޭ މިސްރާބަށް”
“އަހަރެން ހަމައެކަނި ބޭނުންވަނީ ފުޓްބޯޅަ ކުޅެން އަދި އެކަން ފެށުމަށް މިހާރު މިހިރީ ވަރަށް ޝައުޤުވެރިވެފައި. މެންޗެސްޓަރ ޔުނައިޓެޑްގެ އެންމެންނަށް ސީޒަންގެ ބާކީ އޮތް ބަޔަށް ރަނގަޅު ކާމިޔާބީ އަށް އެދެން.” ރެޝްފޯޑްގެ އިންސްޓަގްރާމް ޕޯސްޓަށް ޖަވާބުދެމުން، ކުރީގެ ޓީމްމޭޓް އަދި ރައްޓެހި ޖޭޑަން ސާންޗޯ ބުނީ: “އޭނާ އެނބުރި އައިސްފި!” މިހެންނެއެވެ.
