އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ލެބޯޓްރީގެ ޚިދުމަތް ފެށުމުގެ ވަގުތު އަވަސްކުރުމަށް ނިންމައިފިއެވެ.

އައިޖީއެމްއެޗުން މަޢުލޫމާތު ދެއްވާފައިވާ ގޮތުގައި، މި ބަދަލު ޢަމަލުކުރަން ފަށާނީ މާދަމާއިން ފެށިގެންނެވެ.

އައު ބަދަލާ އެކު، ލެބޯޓްރީގެ ޚިދުމަތް ލިބެން ހުންނާނީ ހެނދުނު 7:30 އިން ފެށިގެން ރޭގަނޑު 10:00 އާ ހަމައަށެވެ. މީގެ ކުރިން މި ޚިދުމަތް ދެމުން ގެންދިޔައީ ހެނދުނު 8:00 އިން ފެށިގެން ރޭގަނޑު 10:00 އާ ހަމައަށެވެ.

އަދި ލެބޯޓްރީގެ ޚިދުމަތް ހޯއްދެވުމަށް ބޭނުންވާ ކިއު ނަންބަރު ދޫކުރުން ކުރިއަށް ގެންދާނީ ހެނދުނު 7:00 އިން ފެށިގެން ރޭގަނޑު 9:30 އާ ހަމައަށެވެ. މި ބަދަލާ އެކު، ކުރިއާ އަޅާބަލާއިރު ޚިދުމަތް ފެށުމުގެ ވަގުތު 30 މިނެޓު އަވަސްވާނެއެވެ.

އައިޖީއެމްއެޗުން ފާހަގަކުރައްވާފައިވާ ގޮތުގައި، މި ބަދަލަކީ ހޮސްޕިޓަލުގެ ޚިދުމަތްތައް އިތުރަށް ހަރުދަނާކޮށް، ބަލިމީހުންނަށް ފަސޭހަކަމާއެކު ޚިދުމަތް ލިބޭނެ މަގު ތަނަވަސްކޮށްދިނުމަށް ގެނެވުނު ބަދަލެކެވެ.