މިއަހަރުގެ ތެރޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފެށޭނެކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވައިފިއެވެ. މި މަޢުލޫމާތު ވަޒީރު ދެއްވީ ޒަކާތު ހައުސްގެ އިމާރާތާ ގުޅޭގޮތުން މީޑިއާތަކަށް މަޢުލޫމާތު ދެއްވަމުންނެވެ.
ވަޒީރުގެ ވާހަކަފުޅުގައި، “ބައިތުއްޒަކާތު” ގެ ނަމުގައި އިމާރާތްކުރާ މި ޒަކާތު ހައުސްގެ އިމާރާތަކީ 10 ފަންގިފިލާއަށް ހެދޭ އިމާރާތެއްކަމަށާއި، މީގެ ތެރޭގައި ޒަކާތު ހައުސްގެ އޮފީސް ބަޔާއި ކުއްޔަށްދޭ ބައިތައް ހިމެނޭނެކަމަށް ވިދާޅުވިއެވެ. އަދި ޒަކާތު ހައުސްގެ އިދާރާގެ ގޮތުގައި ހަދާ އިމާރާތުގެ ބައެއް ފަންގިފިލާތައް ކުއްޔަށް ދީގެން ލިބޭ އާމްދަނީ ދޭނީ ޒަކާތުގެ ޙައްޤުވެރީންނަށްކަންވެސް ވަޒީރު ހާމަކުރެއްވިއެވެ.
މި އިމާރާތް އެޅުމުގެ މަސައްކަތް ފެށޭނެކަން ވަޒީރު ފުރަތަމަ ހާމަކުރެއްވީ މިދިޔަ އަހަރުގެ ނޮވެންބަރު މަހުގެ ތެރޭގައެވެ. އޭރު ވަޒީރު ވިދާޅުވެފައިވަނީ އިމާރާތަށް ބޭނުންވާ ބިން މިހާރު ހަމަޖެހިފައިވާ ކަމަށެވެ.
ރާއްޖޭގައި ޒަކާތް ނެގުމާއި ޒަކާތް ބެހުމުގެ ނިޒާމު ހަރުދަނާކޮށް، ޒަކާތުގެ ފަރުޟު އަދާކުރުމަށް ހޭލުންތެރިކަން އުފެއްދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއްދެއްވާ ކަމެކެވެ. މި މަޤްޞަދުގައި، ޒަކާތުގެ ކަންކަން ބެލެހެއްޓުމަށް ވަކި ޚާއްސަ އިދާރާއެއްވެސް ސަރުކާރުން އުފައްދާފައިވެއެވެ.
މި މަސައްކަތްތަކުގެ ނަތީޖާއެއްގެ ގޮތުން، މިދިޔަ އަހަރަކީ އެންމެ ގިނަ އަދަދަކަށް މުދަލު ޒަކާތުގެ ގޮތުގައި ފައިސާ ލިބުނު އަހަރެވެ. އިސްލާމީ ކަންތައްތަކާބެހޭ ވުޒާރާއިން ހާމަކުރައްވާފައިވާ ގޮތުގައި، މިދިޔަ އަހަރު މުދަލު ޒަކާތުގެ ގޮތުގައި 101 މިލިޔަނަށްވުރެ ގިނަ ރުފިޔާ ލިބިފައިވެއެވެ. މިއީ 2023 ވަނަ އަހަރު ލިބުނު 89.5 މިލިޔަން ރުފިޔާއަށްވުރެ އިތުރު އަދަދެކެވެ.
ކިޔުންތެރިންގެ ހިޔާލު