ބޭންކް އޮފް މޯލްޑިވްސް (ބީއެމްއެލް) އިން އާންމު ހިއްސާދާރުންގެ ފަރާތުން އިންތިޚާބުކުރާ ތިން ޑިރެކްޓަރުންގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ބޭންކުން ދެއްވި މަޢުލޫމާތުގައިވާ ގޮތުން، މި މަޤާމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުން އޮންނާނީ ފެބްރުއަރީ 24 ވަނަ ދުވަހުގެ މެންދުރުފަހު 2:00 އާ ހަމައަށެވެ. އަދި ރާއްޖޭގެ ބޭންކިންގއާބެހޭ ޤާނޫނުގައިވާ ގޮތުގެ މަތިން، މި މަޤާމަށް ކުރިމަތިލެވޭނީ އުމުރުން 30 އަހަރާއި 70 އަހަރާ ދެމެދުގެ ފަރާތްތަކަށެވެ.

މީގެ އިތުރުން، ކުރިމަތިލާ ފަރާތްތަކުގެ ކިބައިގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޕްރުޑެންޝިއަލް ރެގިއުލޭޝަންގެ “ފިޓް އެންޑް ޕްރޮޕަރ ރިކުއަރމެންޓްސް” ގައި ބަޔާންކޮށްފައިވާ މިންގަނޑުތަކާއި ސިފަތައް ފުރިހަމަވާންޖެހޭނެ ކަމަށް ބީއެމްއެލްއިން ފާހަގަކޮށްފައިވެއެވެ.

އަދި ކެޕިޓަލް މާކެޓް ޑިވެލޮޕްމަންޓް އޮތޯރިޓީން އެކުލަވާލާފައިވާ ކޯޕަރޭޓް ގަވަރނަންސްގެ އުސޫލުތަކާ އެއްގޮތްވާ ގޮތުގެ މަތިން، ކޮންމެ ޑިރެކްޓަރަކީވެސް އެ މަޤާމުގެ މަސްއޫލިއްޔަތު އަދާކުރުމުގެ މުގެ ޤާބިލުކަން ލިބިފައިވާ ފަރާތަކަށް ވާންޖެހޭނެއެވެ.

ބީއެމްއެލްގެ ޑިރެކްޓަރުންގެ ބޯޑުގައި ޖުމްލަ 11 މެންބަރުން ހިމެނޭއިރު، އޭގެ ތެރޭގައި ސަރުކާރުން އައްޔަންކުރައްވާ 6 މެންބަރުންނާއި، ބީއެމްއެލްއިން އައްޔަންކުރާ 2 މެންބަރުންނާއި، އަދި އަމިއްލަ ހިއްސާދާރުން ތަމްސީލުކުރައްވާ 3 މެންބަރުން ހިމެނެއެވެ.