ބޭންކް އޮފް މޯލްޑިވްސް (ބީއެމްއެލް) އިން މުޖުތަމަޢުއަށް ޚިދުމަތް ކުރުމުގެ ގޮތުން ކުރަމުންދާ މަސައްކަތުގެ ތެރެއިން، ހުޅުމާލޭގައި ހުންނަ ސަލާހުއްދީން ސްކޫލާއި ހިރިޔާ ސްކޫލުގެ ސެން ކްލާސްރޫމްތައް ވަނީ ތަރައްޤީކޮށްފައެވެ. މި މަޝްރޫޢުގެ ސަބަބުން، މި ދެ ސްކޫލުގެ ސެން ކްލާސްތަކުގައި ކިޔަވަމުންދާ 200 އަށްވުރެ ގިނަ ދަރިވަރުންނަށް ކިޔެވުމަށް އިތުރު ފަސޭހަތަކެއް ލިބިގެންދާނެއެވެ.

ބީއެމްއެލްގެ ފަރާތުން މަޢުލޫމާތު ދެއްވި ގޮތުގައި، މި ދެ ސްކޫލަށް ފޯރުކޮށްދެވުނު އެހީގެ ތެރޭގައި ކްލާސްރޫމްތައް މަރާމާތުކުރުމާއި، ދަރިވަރުންގެ ތަޢުލީމީ ބޭނުންތަކަށް އަމާޒުކޮށްގެން ހޯދާފައިވާ އުނގެނުމުގެ ވަސީލަތްތައް ހިމެނެއެވެ. މި ވއެވެ. މި ވަސީލަތްތަކަކީ ދަރިވަރުންގެ ޤާބިލުކަން އިތުރުކުރުމަށާއި، އިޖުތިމާޢީ ގުޅުން ބަދަހިކޮށް، މުޖުތަމަޢުގައި ހަރަކާތްތެރިވުމަށް ބޭނުންވާ ހުނަރުތައް ތަރައްޤީކުރުމަށް އެހީތެރިވެދޭނެ ތަކެތިކަމުގައި ބޭންކުން ފާހަގަކުރެއްވިއެވެ.

ފާއިތުވި އަހަރުތަކުގައި، ބީއެމްއެލްއިން ވަނީ ރާއްޖޭގެ އެކި ކަންކޮޅުތަކުގައި ހުރި 40 ސްކޫލެއްގެ ސެން ކްލާސްތަކަށް ބޭނުންވާ އާލާތްތައް ހަދިޔާކޮށްފައެވެ. މީގެ އިތުރުން، ޢިމާދުއްދީން ސްކޫލުގައި ތެރަޕީ ރޫމެއް ޤާއިމުކުރުމަށާއި، އަތޮޅުތަކުގެ ސްކޫލުތަކުގެ ކޮމްޕިއުޓަރ ލެބްތައް ތަރައްޤީކުރުމަށްވެސް ބޭންކުން ވަނީ އެހީތެރިކަން ފޯރުކޮށްދީފައެވެ.