ރޭ ފަތިހު ހިނގި އަލިފާނުގެ ހާދިސާއާ ގުޅިގެން 22 ފަރާތަކަށް އެހީތެރިކަން ފޯރުކޮށްދެމުންދާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން މަޢުލޫމާތު ދެއްވައިފިއެވެ.

މި ހާދިސާ ހިނގިކަން ރިޕޯޓުކުރެވިފައިވަނީ ރޭ ފަތިހު 04:20 ހާއިރުގައެވެ. އަލިފާންގަނޑު ކޮންޓްރޯލްކުރެވުނީ ފަތިހު 05:27 ހާއިރުގައި ކަމަށާއި، އަލިފާން މުޅިން ނިއްވާލެވުނީ ހެނދުނު 06:00 ގައި ކަމަށް އެމް.އެން.ޑީ.އެފްއިން ހާމަކުރެއްވިއެވެ.

އެން.ޑީ.އެމް.އޭއިން މަޢުލޫމާތު ދެއްވިގޮތުގައި، އަލިފާނުގެ ހާދިސާގައި ދުމުގެ ސަބަބުންނާއި އިމާރާތްތަކަށް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 ފަރާތެއް ފާހަގަކުރެވުނެވެ. މީގެ ތެރޭގައި ހިމެނެނީ 14 ދިވެހިންނާއި 19 ބިދޭސީންނެވެ. މި ފަރާތްތަކުގެ ތެރެއިން 5 ގޭބީސީއެއްގެ 14 ދިވެހިންނާއި 8 ބިދޭސީންނަށް ވަގުތީ ބޯހިޔާވަހިކަމާއި ކެއުމުގެ އިންތިޒާމު ހަމަޖައްސައިދެމުންދާ ކަމަށް އެން.ޑީ.އެމް.އޭއިން ވިދާޅުވިއެވެ.

މީގެ އިތުރުން، ބިދޭސީ އެއް ޢާއިލާ އަމިއްލަ ވަގުތީ ބޯހިޔާވަހިކަމަކަށް ބަދަލުވެފައިވާ ކަމަށާއި، 11 ބިދޭސީއަކަށް އެ މީހުން ނިސްބަތްވާ ކުންފުނިތަކުން އެހީތެރިކަން ފޯރުކޮށްދީފައިވާ ކަމަށްވެސް އެން.ޑީ.އެމް.އޭއިން ހާމަކުރެއްވިއެވެ.

އެމް.އެން.ޑީ.އެފްގެ މާލެ ފަޔަރ ސްޓޭޝަންގެ އޮފިސަރ ކޮމާންޑަރ، ލެފްޓިނެންޓް އަޙްމަދު ފިރުޝާން ވިދާޅުވިގޮތުގައި، މި ހާދިސާގައި އަލިފާން ރޯވެފައިވަނީ މއ. ސްޕްރިންގް ރިވާ ގޭގެ 1 ވަނަ ފަންގިފިލާގައި ހުންނަ ފްރުޓް ޓްރީ އެޕަލް ފިހާރައިގެ ގުދަނުގައެވެ.

ފިރުޝާން އިތުރަށް ވިދާޅުވީ މި ހާދިސާގައި އެއްވެސް މީހަކަށް ގެއްލުމެއް ވެފައި ނުވާ ކަމަށެވެ. ނަމަވެސް ރައްކާތެރިކަމުގެ ގޮތުން، އެ ސަރަޙައްދުގެ ބައެއް އިމާރާތްތަކަށް ފެން ޖަހައި، އިމާރާތްތަކުން މީހުން ހުސްކުރެވުނު ކަމަށް އޭނާ ހާމަކުރެއްވިއެވެ. އަލިފާން ނިއްވުމުގެ މަސައްކަތުގައި ފުލުހުންނާއި އާންމު ރައމު ރައްޔިތުންގެ ފަރާތުން ބޮޑު އެހީތެރިކަމެއް ލިބުނުކަން އެމް.އެން.ޑީ.އެފްއިން ފާހަގަކުރެއްވިއެވެ.