ދުނިޔޭގައި ﷲ ލައްވާފައިވާ ކޮންމެ ދިރޭއެއްޗަކީ ވެސް އެއެއްޗަކަށް ބޭނުންވާ މިންވަރަށް ދިރިއުޅުމުގެ ކަންކަން ބައްޓަންކުރަންޖެހޭ ބައެކެވެ. އެގޮތުން، ދިރިއުޅުމުގެ އާދަކާދަ އާއި ވައްޓަފާޅިއަށް ބަދަލު ގެނުވައިދޭ އެއްކަމެއްގެ ގޮތުގައި، ދުޅަހެޔޮ ސިއްޙަތެއްގެ ބިންގާ އެޅުން ވަރަށް މުހިންމެވެ. ސިއްޙަތާއި ދިރިއުޅުމުގެ އާދަކާދައާއި ވައްޓަފާޅިއަށް ބަދަލު ގެނެވޭނެ ދެތިން ކުރު ނުކުތާއަކަށް މިދަނޑިވަޅުގައި އަޅުގަނޑު އަލި އަޅުވާލާނަމެވެ.
އެންމެ ފުރަތަމަ ފާހަގަކޮށްލަން ބޭނުންވަނީ، މިންހެޔޮ ކާނާ މިނެ ކިރުމުގައި ބަލަންޖެހޭ ވަރަށް ގިނަ ބާވަތްތަކެއް ހުންނަކަމެވެ. އެގޮތުން ތަރުކާރީ އާއި މޭވާ ހަށިގަނޑަށް ބޭނުންވާ މިންވަރަށް ފޯރުކޮށްދިނުމަކީ މިކަންކަމަށް ޙައްލެއްގެނުވައިދޭ އެއްކަމެއްގެ ގޮތުގައި ބުނުމަކީ ވެސް ދޮގަކަށްނުވާނެއެވެ. ސިއްޙަތަށް ރަނގަޅު ކާނާ ކެއުމާއި، ޤަވާޢިދުން ކަސްރަތު ކުރުމާއި، ނިދި ހަމަކުރުމަކީ ނަފްސާނީ ދުޅަހެޔޮކަމަށް ވަރަށް ބޮޑެތި ބަދަލުތަކެއް ގެނުވައިދޭ ކަމެއްގެ ގޮތުގައިވެސް ފާހަގަކޮށްލެވެއެވެ. އެގޮތުން، ކޮންމެ ދުވަހަކުވެސް ކެއުމުގައި ކޮންމެވެސް އެއް މިންވަރަކަށް ތަރުކާރީ އާއި މޭވާ ބޭނުން ކުރުމާއި، ޕެކެޓްކޮށް ބަންދުކުރެވިފައިވާ ކާބޯތަކެއްޗާއި، ހަކުރުއެކުލެވޭ ކާބޯތަކެތި މަދުކުރުމަކީ ވަރަށް މުހިންމު ކަމަކަށްވާތީ، މިގޮތުގައި ދެމިތިބެވޭތޯ އަހަރުމެން އެންމެވެސް އިސްކަމެއްދޭންޖެހެއެވެ.
މީގެ އިތުރުން، އިށީނދެ އިންނަ ވަގުތު މަދުކޮށް ހެލިފެލިވެ އުޅޭ ވަގުތު އިތުރުކުރުމަކީ ވަރަށް މުހިންމު ކަމެކެވެ. އަދުގެ ޙާލަތަށް ބަލާއިރު ދިރިއުޅުމުގެ އެކި ކަންކަމުގައި އަވަދި ނެތި އުޅުމުގެ ތެރޭގައި، ގައިގައި އުނގުޅޭ ބޭކާރު ވިސްނުމާއި ފިކުރު މަދުކޮށް ހަށިގަނޑުން ބުރަހެލިކަން ފިލުވައިލުމަށް، ހަރުދަނާ ވިސްނުމެއް ގެންގުޅެން އަހަރުމެން އެންމެންވެސް އެބަޖެހެއެވެ. އަދި ދުޅަހެޔޮކަންމަތީ ދެމިތިބެން ބޭނުންވާނަމަ ދުޅަހެޔޮ ބަރުދަނެއް ގައި ހަށިގަނޑު ބެހެއްޓުމަށާއި، ދިރިއުޅުން ވަކި ގޮތަކަށް ބައްޓަންކޮށް ތިމާގެ އާދަކާދަތައް އެންމެ އެދެވޭގޮތެއްްގައި ހިފެހެއްޓުމަށް މަސައްކަތް ކުރަން އަހަރުމެން އެބަޖެހެއެވެ. އެހެންނޫންނަމަ، ދުނިޔޭގައި މިތިބޭ ކުޑަދުވަސްކޮޅުގައި ލިބެންޖެހޭ އެންމެ އެދެވޭ ފޮނިމީރުކަމެއް ދިރިއުޅުމަކަށް ނާންނާނެކަމީ ވިސްނައި ފިކުރުކޮށްލަންޖެހޭ ކަމެކެވެ.
ހަމަމިބީދައިން ކުޑަކުދިންގެ އާދަކާދަތައް ވެސް ސިއްޙީ މިންގަނޑަށް ފެތޭގޮތަށް ބައްޓަންކޮށް އެކުދިންގެ ދިރިއުޅުމަށް އުފާވެރިކަމެއް ގެނެސްދިނުމަށް މަސައްކަތްކުރުމަކީ އަހަރުމެން ބޮޑެތިމީހުން އެކަމުގައި ވަރަށް ބޮޑު ދައުރެއް އަދާކުރަންޖެހޭކަމެކެވެ. ކުދިން ސްކޫލަށް ފޮނުވުމުގެ ކުރިން، އެކުދިންނަށް ދެވޭ މިންހެޔޮ ރަނގަޅު ހެނދުނުގެ ނާސްތާ އަކީ އެކުދިންގެ ވިސްނުންތެރިކަން ތޫނުވެ، ޝައުޤުވެރިކަމާއި އެކު މުދައްރިސުން ދެއްވާ ފިލާވަޅުތައް ކަނުލައި އަޑުއަހައި ކުރިއަށްދިއުމަށް ވަރަށް ބޭނުންތެރި އެއްޗެކެވެ. މީގެ އިތުރުން ކުދިންނަށް ބޭނުންވާ މިންވަރަށް ނިދި ހަމަކުރުމާއި، ސްކްރީން ކުރިމަތީ އެ ކުދިން ހޭދަވާ ވަގުތު މަދުކުރުމުންވެސް ކުދިންނަށް ނަފްސާނީ ގޮތުން ހިތްހަމަޖެހުން ލިބި، ދުޅަހެޔޮ ދަރިންތަކެއް މި ޖީލުގައި ބިނާ ކުރެވިގެންދާނެކަމީ އެއްވެސް ދެބަސްވުމެއް އޮތްކަމެއް ނޫނެވެ.
ވީމާ، އަލިއަޅުވާލި ދެތިން ނުކުތާއަށް ބަލައިލާއިރު އަހަރުމެންގެ ހަށިގަނޑަށް ކުލަހެޔޮ، ދުޅަހެޔޮ ބަދަލެއް ގެނެސްދީ ބަރުދަނަށް ހެޔޮ ފާލެއް ގެނެސްދެވޭނީވެސް މި ގޮތުގެ މަތީން ދުޅަހެޔޮ ސިއްޙަތާއި އެކު ދިރިއުޅުން މިނެކިރައިގެންނެވެ. މިކަންތަކަށް ވިސްނައިގެން ދިރިއުޅުން ބައްޓަންކޮށްފި ކޮންމެ މީހަކަށްވެސް ނަފްސަށް އާރޯކަން ގެނުވައިދީ ވިސްނުންތެރި ޖީލަކާއި އުފާވެރި ދިރިއުޅުމެއް ހޯދިދާނެކަމީ އެއްވެސް ޝައްކެތް އޮތް ކަމެއް ނޫނެވެ.
ނިންމާލުމުގެ ގޮތުން ދަންނަވާނީ، ދުޅަހެޔޮ ސިއްޙަތަކާއި އެކު އުފާވެރި ދިރިއުޅުމެއް ހޯދުމަކީ އަހަރުމެން ކޮންމެ މީހެއްގެ އަތްމަތީގައި އޮތް ކަމެކެވެ. ރަނގަޅު ކާނާ ކެއުމާއި، ޤަވާޢިދުން ކަސްރަތުކުރުމާއި، އެކަށީގެންވާ މިންވަރަށް ނިދުމާއި، ނަފްސާނީ ދުޅަހެޔޮކަމަށް އަހައްމިއްޔަތުކަން ދިނުމަކީ މިކަމަށް އެޅޭ ވަރަށް މުހިންމު ބިންގަލެކެވެ. އަދި މިކަންކަމުގެ މުހިންމުކަން ކުޑަކުދިންނަށް ވެސް އުނގަންނައިދީ، އެކުދިންގެ ދިރިއުޅުން ވެސް ދުޅަހެޔޮ މަގަކަށް އަޅުވައިދިނުމަކީ މުޅި މުޖުތަމަޢުގެ ފައިދާއަށް ކުރެވޭ ކަމެކެވެ. މިފަދަ ހެޔޮ ބަދަލުތަކެއް ގެނައުމަށް މަސައްކަތްކުރުމަކީ އަހަރުމެން އެންމެންގެ ވެސް ޒިންމާއެކެވެ.
ކިޔުންތެރިންގެ ހިޔާލު