އެންޓި ކޮރަޕްޝަން ކޮމިޝަނުން މިހާރު އޭސީސީން ބަލަމުންދާ މައްސަަލައަކާއި ގުޅިގެން ސްޓެލްކޯގެ ކުރީގެ މެނޭޖިންގް ޑިރެކްޓަރ އަހުމަދު ޝަރީފްގެ ޕާސްޕޯޓު ހިފަހައްޓައިފިއެވެ.
ޕާސްޕޯޓް ހިފަހައްޓާފައިވަނީ ޝަރީފްގެ ސީދާ ކޮން މައްސަލައަކާއި ގުޅިގެން ކަމެއް އެނގިފައި ނުވެއެވެ. ނަމަވެސް އޭނާއާއި ގުޅޭ މައްސަލައެއް ބަލަމުންދާކަން އެންޓި ކޮރަޕްޝަން ކޮމިޝަނުން ވަނީ ޔަޤީންކޮށްދެއްވާފައެވެ. ޝަރީފްގެ ޕާސްޕޯޓު ހިފަހައްޓާފައިވަނީ އަންގާރަ ދުވަހު ކޯޓު އަމުރެއްގެ ދަށުންނެވެ.
މިމައްސަލަ އެސީސީން ތަހުޤީޤު ކުރަމުންދާއިރު، ކުރީގެ ސަރުކާރުގެ ބައެއް ވެރިންގެ މައްސަލަތަކެއް އެކި އިދާރާތަކުން ދަނީ ތަހުޤީޤު ކުރަމުންނެވެ. މީގެ ތެރޭގައި ކޮރަޕްޝަނުގެ ބޮޑެތި ތުހުމަތުތައް ހިމެނޭ މައްސަލަތައް ވެސް ދަނީ ބަލަމުންނެވެ.
ފެނަކައިގެ މެނޭޖިންގ ޑިރެކްޓަރުކަމުގެ މަޤާމާއި އިލެކްޝަންސް ކޮމިޝަނުގެ ރައީސްކަމުގެ މަގާމުވެސް އަދާކޮށްފައިވާ ޝަރީފް ސްޓެލްކޯ މެނޭޖިންގް ޑިރެކްޓަރ ކަމަށް ހަމަޖައްސާފައިވަނީ 2022 ވަނަ އަހަރުގެ މާރިޗު މަހުގައެވެ. މައުލޫމާތު ލިބިފައިވާގޮތުގައި ޝަރީފްވަނީ ރައީސްޔާމިންގެ ވެރިކަމުގައި ސިޔާސީ މަގާމުތަށްވެސް ފުރުއްވާފައެވެ.
