އެސްޓޯނިއާގެ ތަޢުލީމާއި ދިރާސާ ވަޒީރު، ކްރިސްޓީނާ ކަލާސް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިޒުގެ އަރިހަށް އިޙްތިރާމުގެ ޒިޔާރަތެއް ކުރައްވަވައި ފިއެވެ.
މި ބައްދަލުވުމުގައި ރައީސް ޑޮކްޓަރ މުޢިއްޒު އެސްޓޯނިއާގެ ތަޢުލީމީ ނިޒާމާ ބެހޭގޮތުން ސުވާލުކުރައްވައި، ދެ ޤައުމުގެ މެދުގައި އެއްބާރުލުން ދެވިދާނެ ދާއިރާތަކާ ބެހޭގޮތުން މަޝްވަރާކުރެއްވިއެވެ. ވަޒީރު ކަލާސް އެސްޓޯނިއާގެ ތަޢުލީމީ އޮނިގަނޑުގެ މައްޗަށް ޚުލާޞާއެއް ދެއްވައި، ދަރިވަރުންނަކީ ކުރިއަރަމުންދާ ވިސްނުމަކާއި ނަތީޖާއަށް އަމާޒުކުރެވިފައިވާ އުސްލޫބެއް ލިބިފައިވާ ބަޔަކަށް ހެދުމަށްޓަކައި ގެންގުޅޭ ސިޔާސަތުތަކާ ބެހޭގޮތުން ތަފުސީލުކޮށް މަޝްވަރާކުރެއްވިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެސްޓޯނިއާއަށް މި ކުރައްވާ ދަތުރުފުޅުގައި ޑިޖިޓަލް ޓެކްނޮލޮޖީ، ސައިބަރ ސެކިއުރިޓީ، އީ-ގަވަރނަންސް، މޫސުމީ ބަދަލުތަކާއި ތަޢުލީމީ ދާއިރާއިން ދިވެހިރާއްޖެއާއި އެސްޓޯނިއާއާ ދެމެދު ގުޅުން ބަދަހިކުރުމާއި، ގުޅިގެން މަސައްކަތް ކުރުމަށް އިތުރު ފުރުސަތުތައް ހޯއްދެވުމަށް މަސައްކަތް ކުރައްވާނެކަށް މައުލޫމާތު ކުރިން ލިބިފައިވެއެވެ.
