އިސްރާއީލްގެ އަނިޔާވެރިކަން ހުއްޓުމެއްގެ ވާހަކަތައް ދެކެވެމުންދާއިރުވެސް އިސްރާއީލުގެ ސިފައިން ވަނީ އުތުރުގެ މުޙާޞަރާއާއި މުޅި ޣައްޒާގެ މައްޗަށް ކުރާ ޙަމަލާތައް އިތުރަށް ހަރުކަށިކޮށްފައެވެ.

އިސްރާއީލާއި ޙަމާސްއާ ދެމެދު މެދުވެރިއެއްގެ އެހީގައި އެއްބަސްވުމަކަށް އާދެވިދާނެ ކަމުގެ ވާހަކަތައް ދެކެވެމުންދާއިރުވެސް، އިސްރާއީލުގެ ސިފައިންގެ އުތުރު ޣައްޒާގެ މައްޗަށް ކުރި މުޙާޞަރާގައި 100 ދުވަހުގެ ތެރޭގައި ވަރަށް އަނިޔާވެރި ޙަމަލާތަކެއްގެ ސަބަބުން 5،000 އާ ގާތްކުރާ ފަލަސްޠީނު މީހުންވަނީ ޝަހީދުކޮށްލާފައިއެވެ.

އޮކްޓޯބަރު މަހުގެ ކުރީކޮޅު ފެށުނު އުތުރުގެ މައްޗަށް އިސްރާއީލުގެ ސިފައިން ކުރި އަނިޔާވެރި ޢަމަލިއްޔާތުގެ ސަބަބުން އިތުރު 9،500 ފަލަސްޠީނު މީހުންނަށް ވަނީ އަނިޔާވެފައި ކަމަށް މެޑިކަލް މަޞްދަރަކުން އާދީއްތަ ދުވަހުވަނީ މަޢުލޫމާތު ދީފައިވެއެވެ.

ޣައްޒާގެ ސަރުކާރުގެ މީޑިއާ އޮފީހުން އާދީއްތަ ދުވަހު އިސްރާއީލުގެ މުޙާޞަރާ ވަނީ “އެންމެ ނުރައްކާތެރި ބާވަތުގެ ނަސްލީ ޠާހިރުކުރުމާއި، ބަދަލުކުރުމާއި އަދި ހަލާކުކުރުން” ކަމަށް ބުނެފައެވެ. އަދި މިކަމުގެ ސަބަބުން ހަނގުރާމައިގެ ވޭނުގައި އުޅޭ ސަރަޙައްދުގެ ސަތޭކަ ހާސް މީހުންނަށް އަސަރުކޮށްފައިވާ ކަމަށްވެސް ބުނެފައިވެއެވެ.

“އަޅުގަނޑުމެންނަށް ފެންނަނީ ފަލަސްޠީނު މީހުން މުޅި ޣައްޒާ ތެރޭގައި ކޮންމެ ތަނެއްގައިވެސް ގަސްދުގައި ހަމަލާ އަމާޒުކުރެވެމުންދާ މަންޒަރު. ތިބާ ހުރި ތަނަކުން މުހިންމެއް ނޫން – ސްކޫލެއްގައި، ހިޔާވަހިކަމެއްގައި، ވަގުތީ ކޭމްޕެއްގައި ނުވަތަ ހޮސްޕިޓަލެއްގައި ވިޔަސް،”

މެދު ޣައްޒާގެ ދެއިރު އަލް-ބަލަޙުން ރިޕޯޓުކުރަމުން، ހިންދު ޚުދައިރީ ވަނީ އުތުރު ޣައްޒާއަކީ މިހާރު “ބޮޑު ހަލާކުވުމާއި ވީރާނާގެ ސަބަބުން ހުސްވެފައިވާ ސަރަޙައްދެއް” ކަމަށް ބުނެފައެވެ. ނަމަވެސް ބައެއް މީހުން ވަނީ އެތަނުން ނުނިކުމެ އެތާ ދިރިތިބެވޭތޯ މަސައްކަތްކުރަމުންނެވެ.