ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ފަރާތުން ނޭޝަނަލް ޑްރަގް އޭޖެންސީ(އެންޑީއޭ)އަށް ޑްރަގް ޓެސްޓް ކިޓްތަކެއް ހަދިޔާކޮށްފިއެވެ.

މިކަމަށްޓަކައި އެންޑީއޭގައި ބޭއްވި ރަސްމިއްޔާތުގައި އެންޑީއޭގެ ފަރާތުން ޑްރަގް ޓެސްޓް ކިޓްތަކާއި ހަވާލުވެލެއްވީ، އެންޑީއޭގެ އެކްޓިން ސީއީއޯ އަހުމަދު އިބްރާހިމް ދީދީއެވެ.

ކިޓްތައް ހަވާލުކޮށްދެއްވީ، ޔޫއެންއޯޑީސީގެ ރީޖަން އޮފިސަރު، ކްރިސްޓިއަން ހޯލެގްއެވެ.

ޔޫއެންއޯޑީސީއިން ރާއްޖެއަށް ހަދިޔާކޮށްފައިވާ ޓެސްޓް ކިޓްތަކުގެ ތެރޭގައި ހިމެނެނީ، 30 ޑްރަގް ޓެސްޓް ކިޓާއި، 30 ޕްރިކާސާރ ކެމިކަލް ކިޓުގެ އިތުރުން 180 ޕޮކެޓް ކެމިކަލް ޓެސްޓް ކިޓެވެ. މީގެއިތުރުން ޓެސްޓް ކިޓްތައް ބޭނުންކުރާނެ ގޮތުގެ ތަމްރީން ވީޑިއޯތައް ހިމެނޭ 5 ޔޫއެސްބީ ޑްރައިވްވެސް ވަނީ ހަދިޔާ ކޮށްފައެވެ.

މި ޓެސްޓް ކިޓްތަކަކީ އެއް ކިޓުން 500 ޓެސްޓް ކުރެވޭނެ ގޮތަށް ފަރުމާ ކޮށްފައިވާ ކީޓްތަކެއް ކަމަށެވެ. ހަމައެއާއެކު، މި ކިޓްތައް ތައްޔާރުކޮށްފައިވަނީ، ވަގުތު ސަލާމަތްކޮށް، ސައްޙަ ނަތީޖާ ފޯރުކޮށްދިނުމުގެ އިތުރުން ހެއްކެއްގެ ގޮތުގައި ބޭނުންކުރެވޭނެ ގޮތަށެވެ.

މި ޓެސްޓް ކިޓުތަކަކީ ޢާއްމުކޮށް ރާއްޖެއަށް އެތެރެކުރާ މަސްތުވާތަކެތީގެ 10 ބާވަތް ޓެސްޓް ކުރެވޭނެހެން ތައްޔާރުކޮށްފައިވާ ކިޓުތަކެކެވެ.