އަރަބިއަން ގަލްފް މިހާރު އޮތީ “ބޮމެއް” ފަދައިން ގޮވަން ތައްޔާރުވެފައެވެ.

ދުނިޔޭގެ އެންމެ ބާރުގަދަ ކަމަށް ބުނާ އެމެރިކާގެ ވެރިކަމުގައި ހުރި ހަނގުރާމައިގެ ރައީސް ޑޮނަލްޑް ޓްރަމްޕްގެ އަމުރަށް، އެމެރިކާ އަސްކަރިއްޔާއިން މިހާރުވަނީ މެދުއިރުމައްޗަށް ހަނގުރާމައިގެ ބިޔަ ލަޝްކަރެއް ޖަމާކޮށްފައެވެ.

އެންމެ ޒަމާނީ ބޮންއަޅާ މަތިންދާ ބޯޓުތަކާއި، ވައިގެމަގުންނާއި ކަނޑުމަގުން މިސައިލް ހަމަލާދޭ އުޅަނދުތަކާއި، ސަބްމެރިންތައް ވަނީ މެދުއިރުމަތީގައި ހުރި އެމެރިކާގެ އަސްކަރީ ބޭސްތަކަށާއި، އެއަރބޭސްތަކަށް ޖަމާކޮށްފައެވެ.

ކަނޑުގެ ސަރަހައްދަށް ހަނގުރާމައިގެ އެންމެ ބޮޑެތި މަނަވަރުތަކާއި، ސިފައިން ޖަމާކޮށްފައި ވާއިރު، އެމެރިކާގެ ބޭސްތައް ވަށައިގެން މިސައިލުން ދިފާއުވާ އައްޑަނަތައް ގާއިމް ކޮށްފައި ވެއެވެ. އަދި އީރާނުގެ ފަރާތުން އަންނާނެ މިސައިލްތަކުން އިސްރާއީލު ސަލާމަތް ކުރުމަށް އިސްރާއީލުގައިވެސް އެންމެ ޒަމާނީ އައްޑަނަތައް ގާއިމްކޮށްފައި ވެއެވެ.

އެމެރިކާ އަސްކަރިއްޔާގެ ސެންޓްރަލް ކޮމާންޑުގެ ކޮމާންޑަރު އިސްރާއީލަށް ގޮސް، އިސްރާއީލުގެ އަސްކަރީ ޖެނެރަލުންނާއެކު ސިއްރު ސައްލާތައްކޮށް، ރޭވުންތައް ރާވާފައި ވެއެވެ.

އަދި އީރާނުން ފޮނުވާލާ މިސައިލްތަކާއި، ހަމަލާދޭ ޑްރޯންތައް ވައިގެމަގުން ހުރަސްކުރާ އަރަބި ގައުމުތަކުގެ އަސްކަރީ ޖެނެރަލުންވެސް އިސްރާއީލަށް ގެންގޮސް ރޭވުންތައް ރާވާފައިވެއެވެ.

އެއީ، އެމެރިކާގެ ބޭސްތަކަށާއި، އިސްރާއީލާ ހަމައަށް މިސައިލްތަކާއި ޑްރޯންތައް ފޯރުމުގެ ކުރިން ވައްޓާލުމުގެ މަސައްކަތް ކުރުމަށްޓަކައެވެ. މިދިޔަ އަހަރުގެ ޖޫންމަހު އީރާނާއި އިސްރާއީލާ ދެމެދު ކުރި 12 ދުވަހުގެ ހަނގުރާމައިގައިވެސް އެ ގައުމުތަކުން ވަނީ އެފަދައިން ކަންތައް ކޮށްދީފައެވެ.

އީރާނުގައި ވަރުގަދަ ވައިގެ ބާރެއް އޮތްނަމަވެސް، ހަނގުރާމައިގެ އެންމެ ޒަމާނީ ޖެޓުތައް ހުރި ނަމަވެސް، އެމެރިކާގެ ބޭހަކަށް އަދި އިސްރާއީލަށް ވައިގެމަގުން ހަމަލާދޭން އީރާނުގެ ޖެޓަކަށް އަރަބި ގައުމުތަކުގެ ވައިގެ ސަރަހައްދަށް ނުވަދެވެއެވެ. ވަންނައިރަށް ވައްޓާލާނޭ ކަމުގެ އިންޒާރު ދެމުން ގެންދެއެވެ. ކުރިންވެސް ވީ އެހެންނެވެ.

އެމެރިކާއިން އީރާނަށް އަސްކަރީ ހަމަލާ ދީފިނަމަ، ހަމަލާ ދިނުމަށް އެހީތެރިވާ ސަރަހައްދުގެ ގައުމެއްވެސް މިފަހަރު ސަލާމަތް ނުވާނޭ ކަމަށް އީރާނުން ތަކުރާރުކޮށް ގެންދަނީ އިންޒާރު ކުރަމުންނެވެ.

ސަރަހައްދުގެ ގައުމުތަކުގައި ގާއިމްކޮށްފައިވާ އެމެރިކާގެ އަސްކަރީ ހުރިހާ ބޭހަކަށް ރައްދު  ހަމަލާތައް ދޭނޭ ކަމަށް އީރާނުން ގެންދަނީ ބުނެ އިންޒާރު ކުރަމުންނެވެ.

އަދި ހަމައެއާއެކު، އިސްރާއީލަށްވެސް ރައްދު ހަމަލާ ދޭނޭ ކަމަށް ތަކުރާރުކޮށް ބުނަމުން ގެންދެއެވެ.

ރިޕޯޓްތައް ބުނާގޮތުގައި އީރާނުން ރާވާފައިވަނީ، ހައިޕަރސޮނިކް ބެލިސްޓިކް މިސައިލާއި، ހަމަލާދޭ ޑްރޯންތަކުގެ އެތައްހާސް ހަމަލާއެއް އެއްފަހަރާ ފޮނުވާލުމަށެވެ. މިއީ، މިސައިލުން ދިފާއުވާ އައްޑަނަތަކަށްވެސް ކެތްނުވާވަރު ކޮށްލުމުގެ ބޭނުމުގައި ކުރާނެ ކަމެއް ކަމަށް ވެއެވެ.

އަނެއްކޮޅުން، އީރާނުގައި ބޭނުންކުރާ ފައްތާހް-1 އަދި ފައްތާހް-2 ހައިޕަރސޮނިކް ބެލިސްޓިކް މިސައިލްތަކަކީ އަޑަށްވވުރެންވެސް އެތައްގުނަ ބާރަށް ދަތުރުކުރާ މިސައިލް ތަކެކެވެ. އެމެރިކާގެ އެންމެ ޒަމާނީ އައްޑަނައަކަށްވެސް މީގެން މިސައިލެއް މަތަކުރެވެނީ ވަރަށް މަދު ފަހަރެއްގައިކަން ޖޫންމަހުވަނީ ސާބިތުވެގެން ގޮސްފައެވެ.

އީރާނުގެ އެއްގަމާއި، ވަޔާއި އަދި ކަނޑުގެ ސިފައިން އެމެރިކާގެ ހަމަލާތަކަށް ރައްދު ދިނުމަށް ތައްޔާރުވެފައި ވާއިރު، އަދި އީރާނުގެ ބައެއް ރޭވުންތަކުގެ ޚަބަރު ލިބި އެމެރިކާއާއި އިސްރާއީލުންވެސް މިހާރު ރާވާފައިވަނީ އެއްފަހަރާ ވަރަށް ބައިވަރު ހަމަލާ އީރާނަށް ދިނުމަށް ކަމަށް އަޑުތައް އަރާފައި ވެއެވެ.

ރިޕޯޓްތައް ކުރިންވެސް ބުނަމުން ގޮސްފައިވަނީ ޖެނުއަރީ 31 ގެ ކުރިން އެމެރިކާއިން އީރާނަށް ހަމަލާ ދޭނެ ކަމަށެވެ. އެމެރިކާއިން ސަރަހައްދުގައި ހިންގާ އަސްކަރީ ހަރަކާތްތަކުން މަންޒަރު ފެންނަނީ އެފަދަ ގޮތަކަށެވެ. އީރާނުން ދީފާނެ ހަމަލާއަކަށް އިސްރާއީލުވެސް މިހާރު ތައްޔާރުވެފައިވާ ކަމަށް ރިޕޯޓްތައް ބުނެއެވެ.

މަސްރަހް ދިރާސާކުރާ ބައެއް ފަރާތްތަކުން ލަފާކުރަނީ ކުރިއަށްއޮތް 24 ގަޑިއިރުގެ ތެރޭގައި އެމެރިކާއިން އީރާނަށް ހަމަލާދޭން ފަށާނޭ ކަމަށެވެ.

އެމެރިކާއިން އީރާނަށް އަސްކަރީ ހަމަލާ ދޭން މިއުޅެނީ، އީރާނު ސަރުކާރާ ދެކޮޅަށް މުޒާހަރާ ކުރާ މީހުންގެ ގަޔަށް ބަޑިޖަހައި މަރަމުން ގެންދާތީ އެކަން ހުއްޓުވައި، އިސްރާއީލުން އެދިގެން އީރާނުގެ ވެރިކަންވެސް ބަދަލުކޮށްލުމަށެވެ.

އެކަމަކު، އެމެރިކާގެ އެތެރޭގެ ހާލަތުވެސް ވަކި ރަނގަޅެއް ނޫނެވެ. ސަރުކާރާ ދެކޮޅަށް މުޒާހަރާ ކުރާ މީހުންގެ ގަޔަށް ބަޑިޖަހައި މަރައި، އަނިޔާވެރި ގޮތެއްގައި މީހުން ހިފައި ހައްޔަރުކޮށް، ލާއިންސާނީ އެތައް  ޖަރީމާއެއް އެމެރިކާގެ އައިސް އޭޖެންޓުން ގެންދަނީ އެމެރިކާގެ އެކި ސްޓޭޓްތަކުގައި ހިންގަމުންނެވެ.

ޓްރަމްޕްގެ ސަރުކާރާ ދެކޮޅަށް އެމެރިކާގެ އެތައް ސްޓޭޓެއްގައި މިހާރު ވަރުގަދަ މުޒާހަރާތަކެއް  ފަށައިގެން ކުރިއަށް އެބަދެއެވެ.