އަންނަ އަހަރު ބާއްވާ ލޯކަލް ކައުންސިލް އިންތިޚާބާ ގުޅޭގޮތުން އާންމުން ހޭލުންތެރިކުރުވުމަށް “ރަށުގެ ކުރިމަގު”ގެ ނަމުގައި އިލެކްޝަންސް ކޮމިޝަން (އީސީ) އިން ކުރިއަށްގެންދާ ޓިކްޓޮކް މުބާރާތުގައި ބައިވެރިވުމުގެ ފުރުސަތު އެ ކޮމިޝަނުން އިތުރުކޮށްފިއެވެ.

މި މުބާރާތުގައި ބައިވެރިވުމަށް ވީޑިއޯ ހުށަހެޅުމުގެ ސުންގަޑިއެއްގެ ގޮތުގައި އީސީން އެންމެ ފުރަތަމަ ކަނޑައަޅާފައި އޮތީ މި ހިނގާ މަހުގެ 10 ވަނަ ދުވަހުގެ މެންދުރު 14:00 ގެ ނިޔަލަށެވެ. ނަމަވެސް، ވީހާވެސް ގިނަ ފަރާތްތަކަށް ފުރުސަތު ދިނުމުގެ ގޮތުން މިހާރު އެ މުއްދަތު ވަނީ މި މަހުގެ 31 ވަނަ ދުވަހުގެ މެންދުރު 14:00 އާ ހަމައަށް އިތުރުކޮށްފައެވެ.

އިންތިޚާބާ ގުޅޭ މުހިންމު މައުލޫމާތުތައް ފޯރުކޮށްދިނުމަށް ބާއްވާ މި މުބާރާތަކީ ފައިސާގެ އިނާމުތަކެއް ވެސް ކަނޑައެޅިފައިވާ މުބާރާތެކެވެ. އެގޮތުން މުބާރާތުން އެއްވަނައަށް ހޮވޭ ފަރާތަކަށް 5،000 ރުފިޔާ، ދެވަނައަށް 3،000 ރުފިޔާ އަދި ތިންވަނައަށް ދާ ފަރާތަކަށް 2،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.

މި މުބާރާތަށް ވީޑިއޯ ތައްޔާރުކުރުމަށް އީސީން ވަނީ މައިގަނޑު ހަތަރު މައުޟޫއެއް ކަނޑައަޅާފައެވެ. އޭގެ ތެރޭގައި ވޯޓުލުމަށް ބޭނުންކުރާ ރަސްމީ ލިޔެކިޔުންތަކާއި، ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލުމުގެ މުހިންމުކަމުގެ އިތުރުން، އިންތިޚާބެއްގެ ތެރޭގައި ކޮށްގެން ނުވާނެ ކަންކަމާއި، މައުލޫމާތުގެ ސައްހަކަން ކަށަވަރުކުރުމުގެ މުހިންމުކަން ހިމެނެއެވެ. ބައިވެރިންނަށް މިއިން ކޮންމެ މައުޟޫއަކަށް ވަކިވަކިން ވީޑިއޯ ހުށަހެޅިދާނެކަމަށް އީސީން ބުނެއެވެ.

މުބާރާތުގެ ގަވާއިދުގައިވާ ގޮތުން، ހުށަހަޅާ ވީޑިއޯތަކުގެ ދިގުމިނަކަށް ވާންވާނީ 30 ސިކުންތާއި ދޮޅު މިނެޓާ ދެމެދުގެ ވަގުތެކެވެ. އަދި މި ވީޑިއޯތަކަކީ ސިޔާސީ ގޮތުން ވަކި ކޮޅަކަށް ނުޖެހި، އާންމު ހޭލުންތެރިކަން އިތުރުކުރެވޭނެ ގޮތަށް ތައްޔާރުކޮށްފައިވާ ވީޑިއޯތަކަކަށް ވާންޖެހޭނެ ކަމަށް ވެސް އެ ކޮމިޝަނުން މައުލޫމާތު ދެއެވެ.