ތިލަމާލެ ބުރިޖުގެ މަސައްކަތް މިއަހަރުގެ ނިޔަލަށް ވިލިމާލެއާ ހަމައަށް ނިންމާލެވޭނެ ކަމަށް ލަފާކުރެވޭ ކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ. މަސައްކަތް ހުއްޓުމެއްނެތި ކުރިއަށްދިޔަ ނަމަވެސް، ކޮންޓްރެކްޓަރުގެ ހުރި ބައެއް ދަތިތަކާހުރެ ބޭނުންވާ އެންމެ ބާރު ދުވެލީގައި މަސައްކަތް ނުދާކަން ވަޒީރު ފާހަގަކުރެއްވިއެވެ.
ކުރީ ސަރުކާރުން މި މަޝްރޫޢަށް 30 މަސްދުވަސް އިތުރުކޮށްފައިވާއިރު، މިހާރު ދާ ދުވެލީގައި މުޅި މަޝްރޫޢު އެއްކޮށް ނިންމާލެވޭނީ 2027 ވަނަ އަހަރުގެ ނިޔަލަށް ކަމަށް ބެލެވެއެވެ. މަސައްކަތް އަވަސްކުރުމަށްޓަކައި އިންޑިއާ ސަރުކާރާއި ކޮންޓްރެކްޓަރާ އެކު ދިވެހި ސަރުކާރުން އަންނަނީ މަޝްވަރާ ކުރަމުންނެވެ.
މިހާރުގެ ތަފާސްހިސާބުތަކަށް ބަލާއިރު، ބުރިޖުގެ ގާތްގަނޑަކަށް %70 މަސައްކަތް ވަނީ ނިމިފައެވެ. މީގެ ތެރޭގައި ހަތަރު ރަށް ގުޅާލުމަށް ބޭނުންވާ ތަނބުތަކުގެ މަސައްކަތާއި، ތަނބުތަކުގެ މަތީ ސްޓްރަކްޗަރގެ ބޮޑު ބައެއް ހިމެނެއެވެ. އަދި ބުރިޖުގެ ސެގްމަންޓްތައް ކާސްޓްކުރުމުގެ މަސައްކަތްވެސް ބާރަށް ކުރިއަށްދާކަން ފާހަގަކުރެވެއެވެ.
ތިލަމާލެ ބުރިޖަކީ މާލެ، ވިލިމާލެ، ގުޅިފަޅު އަދި ތިލަފުށި ގުޅާލުމަށް ހިންގާ 6.7 ކިލޯމީޓަރުގެ ބޮޑު މަޝްރޫޢެކެވެ. މި މަޝްރޫޢަށް ޖުމްލަ 500 މިލިއަން ޑޮލަރު ހޭދަވާއިރު، މީގެ ތެރޭގައި އިންޑިއާ ސަރުކާރުގެ އެހީއާއި ލޯނު އެހީގެ އިތުރުން ދިވެހި ސަރުކާރުގެ ޚަރަދުތައް ހިމެނެއެވެ.
ކިޔުންތެރިންގެ ހިޔާލު