މާލޭގެ ބާޒާރުމަތީގެ މަގު ފުޅާކުރުމުގެ މަސައްކަތަށް ނެގި ހިރުނދު ގަސްތައް ހުޅުމާލޭގައި އިންދުމުގެ މަސައްކަތް އެޗްޑީސީން ފަށައިފިއެވެ.
އެޗްޑީސީގެ ޗީފް އޮޕަރޭޓިން އޮފިސަރު އަހްމަދު އިބްރާހީމް ވިދާޅުވީ ބޮޑުތަކުރުފާނު މަގުގައި ހުރި ބޮޑެތި ހިރުނދު ގަސްތައް އެ ސަރަހައްދުން ނަގައިގެން ގެންގޮސް، ހުޅުމާލެ 1 އާއި 2 ގުޅޭ ޗެނަލް ޕާކު ސަރަހައްދުގައި އިންދުމުގެ މަސައްކަތް ކުރަމުން އަންނަ ކަމަށެވެ.
މަގު ހެދުމަށް އެ ގަސްތައް އެ ސަރަހައްދުން ނެގުމުން ބައެއް ފަރާތްތަކުން ވަނީ ފާޑުކިޔާފައެވެ. ނަމަވެސް އެ ގަސްތައް އެތަނުން ނުނަގައި މަގު ހެދުމުގެ މަސައްކަތް ކުރިއަށްގެންދެވޭނެ އެއްވެސް ގޮތެއް ނެތެވެ. އެހެންވެ ސަރުކާރަށް މަޖުބޫރުވީ އެ ގަސްތައް އެތަނުން ނަގައި އެހެން ސަރަހައްދެއްގައި އިންދުމަށެވެ.
ބޮޑުތަކުރުފާނު މަގު ފުޅާކުރުމުގެ މަޝްރޫއުގެ ފުރަތަމަ ސެގްމަންޓު ކަމަށްވާ މަސްމާރުކޭޓާ ހިސާބުން ފެށިގެން ދެކުނަށް ގޮސް ޖުމްހޫރީ މައިދާނުގެ މެދަކާ ހިސާބަށް އެއްގަމުތޮށި ބޭރަށް ޖައްސައި، އެ މަގު ވަނީ ހަތަރު ލޭނަށް ފުޅާކޮށް، ތާރު އަޅައިފަ އެވެ. އެ މަސައްކަތް ނިންމާލުމަށް ފަހު މަގު ހުޅުވާލީ މި މަހު ކުރީކޮޅުގައެވެ.
ފުރަތަމަ ސެގްމަންޓުގެ މަސައްކަތެކޭ އެއްގޮތަށް މަސްމާރުކޭޓާ ހިސާބުން ފެށިގެން ނޯތު ހާބަރާ ހަމައަށް އެއްގަމުތޮށި ބޭރަށް ޖައްސައި ހަތަރު ލޭނަށް މަގުފުޅާ ކުރާނެ އެވެ. އޭގެ އިތުރުން މުޅި އެ މަގުގައި ތާރު އަޅައި އެންމެ ޒަމާނީ ފެންވަރުގެ މަގަކަށް ބަދަލު ކުރާނެއެވެ.
ކިޔުންތެރިންގެ ހިޔާލު