މި ޒަމާނުގައި ހަދާފައިވާ ޓުރެފިކް ގަވާއިދުތަކާއި އުސޫލުތަކަކީ އިސްމާލީ ޝަރީއަތާއި ތަޢާރުޒްވާ އެއްޗެއް ނޫން ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.

“ތިމާއާއި އަނެއްކުންގެ ރައްކާތެރިކަމަށް ސަމާލުވާށެވެ!” މިމައުޟޫއަށް ޚާއްސަ ކުރެވުނު މިއަދުގެ ޚުޠުބާގައި ވިދާޅުވީ ކީރިތި ރަސޫލާގެ ޒަމާނުގައި އިންޖީނުލީ އުޅަނދު ނުހުންނަ ކަމަށާއި، މިހާރު މިހުންނަ ފަދަ ޓުރެފިކް ގަވާއިދުތައް އޭރު ނުހުންނަ ކަމުގައެވެ. އެހެންނަމަވެސް މަގުހިނގާ މީހުންގެ ހައްގުތަކާއި މަގު ބޭނުންކުރާ މީހުން ތަބާވާންޖެހޭ އުސޫލުތަކާއި، ވާޖިބުތައް އޭރުވެސް ހުންނަ ކަމަށާއި، އެގޮތުން އެ ހައްގުތަކާއި ވާޖިބުތަކުގެ ބޭނުމަކީ ރައްޔިތުންގެ އަމާންކަމާއި ރައްކާތެރިކަން ކަށަވަރު ކުރުމުން ކަމުގައި ޚުޠުބާގައި ވިދާޅުވެފައި ވެއެވެ.

އެއްވެސް މީހަކަށް އަނެކާއާހުރެ އުނދަގުލެއް ފޯރިޔަ ނުދިނުމެވެ. އެ މޭރުމުން ވިސްނާލާއިރު، މިޒަމާނުގައި ހަދާފައިހުރި ޓްރެފިކް ގަވާއިދުތަކާއި އުސޫލުތަކަކީ، އިސްލާމީ ޝަރީއަތާ ތައާރުޒުވާ އެއްޗެއް ނޫނެވެ. އަދި ކިއެއްތަ! އެއާ އެއްގޮތަށް އަމަލު ކުރުމަކީ ވާޖިބުކަމެކެވެ. އެ ގަވާއިދުތަކަކީ ޢާންމު މަސްލަހަތާއި، މީހުންގެ މުދަލާއި، ފަރުދުންނާއި، ޖަމާއަތުގެ ރައްކާތެރިކަމަށްޓަކާ ހެދިފައިވާ އެއްޗަކަށް ވާތީއެވެ. އިސްލާމް ދީނުގައި ގެއްލުން ދިނުމެއް އަދި ގެއްލުން ލިބިގަތުމެއްވެސް ނެތެވެ.

މިއަދުގެ ޚުޠުބާގައި ވިދާޅުވެފައި ވެއެވެ.

ޚުޠުބާގައި އިތުރަށް ވިދާޅުވީ، ހަދީސުން ސާބިތުބާ ގޮތުގައި މީހަކަށް ގެއްލުމެއް ވާނެކަމެއް ކުރުމަކީ އިސްލާމްދީނުގައި މަނާކަމެއް ކަމުގައެވެ. އެގޮތުން ޓްރެފިކް ގަވާއިދާ ޚިލާފް ވުމަކީ އޭގެ ސަބަބުން ތިމާގެ އަމިއްލަ ނަފުސަށާއި އެހެން މީހުންނަށާއި މުދަލަށް ގެއްލުން ލިބިދާނޭކަމެއް ކަމުން، އިސްލާމީ ޝަރީޢަތުގައި ގެއްލުމެއް ލިބޭފަދަ އެއްވެސް ކަމެއް ކުރުމަކީ ހުއްދަ ކަމެއް ނޫންކަމުގައި ޚުޠުބާގައި ވިދާޅުވެފައި ވެއެވެ.