އިސްރާއީލަށް ހަތިޔާރު ފޯރުކޮށްދިނުން ވަގުތުން ހުއްޓާލަން، އދގެ މިނިވަން ތަހްގީގު ކޮމިޝަނުން އދގެ މެމްބަރު ހުރިހާ ގައުމަކަށް ގޮވާލައިފިއެވެ.
އދގެ ތަހްގީގު ކޮމިޝަނުން މިކަމަށް ގޮވާލީ، އިސްރާއީލުން ޣައްޒާގައި ހިންގަމުންގެންދާ އުދުވާނުތައް ތަހްގީގު ކުރުމަށްފަހު، މިއީ ޣައްޒާގެ ނަސްލުނައްތާލަން ދެމުންގެންދާ ހަމަލާތަކެއް ކަމަށް ރަސްމީގޮތުން ކަނޑައެޅުމަށް ފަހުގައެވެ.
މިގޮތަށް ކަނޑައެޅުމަށްފަހު، މެމްބަރު ގައުމުތަކަށް އެ ކޮމިޝަނުން ހަތަރު ރެކޮމެންޑޭޝަނެއް ހުށަހަޅާފައި ވެއެވެ.
އޭގެ ތެރޭގައި ހިމެނެނީ، ނަސްލުނައްތާލުން ވަގުތުން ހުއްޓުވައި، ހަމަލާތައް ހުއްޓާލުމުގެ އެއްބަސްވުމެއް ހަދައި ތަންފީޒު ކުރުމަށާއި، އެއްވެސް ހުރަހެއްނެތި އދގެ ސްޓާފުންނަށް ޣައްޒާއަށް ވަދެވޭނެގޮތް ހެދުމަށާއި، ޣައްޒާގައި އާންމުވެފަިއވާ ބަނޑުހައިހޫނުކަން ނިންމުމަކަށް ގެނައުމަށާއި، އިންސާނީ އެހީ ބެހުމުގެ ނަމުގައި އުޅޭ ޖީއެޗްއެފް ޣައްޒާއިން ބޭރުކުރުމަށާއި، އެއްވެސް ހުރަހެއްނެތި އިންސާނީ އެހީ ޣައްޒާއަށް އެތެރެކުރެވޭނެ ގޮތް ހެދުމަށެވެ.
ހަމަ އެއާއެކު، ޣައްޒާގައި ހިންގާ ނަސްލުނައްތާލުން ވަގުތުން ނިމުމަކަށް ގެނައުމަށް، ލިބިފައި ހުރި ހުރިހާ ވަސީލަތެއްގެ ބޭނުން ހިފުމަށް މެމްބަރު ގައުމުތަކަށް ކޮމިޝަނުން ގޮވާލާފައި ވެއެވެ.
އަދި މަތިންދާ ބޯޓަށް އަޅާ ތެލާއި، ހަތިޔާރާއި، ހަނގުރާމައިގައި ބޭނުންކުރާ އެނޫންވެސް އާލާތްތައް އިސްރާއީލަށް ފޯރުކޮށްދިނުން ވަގުތުން ހުއްޓާލަންވެސް، ގައުމުތަކަށް ގޮވާލާފައި ވެއެވެ.
އިސްރާއީލާ ދެކޮޅަށް ދަތިކުރުމުގެ ފިޔަވަޅު އެޅުމަށާއި،ނަސްލުނައްތާލުމަށް އެހީތެރިވާ އަދި އެކަމަށް ތާއީދުކުރާ ވަކިވަކި ފަރުދުންނާއި، ކުންފުނިތަކާ ދެކޮޅަށްވެސް ދަތިކުރުމުގެ ފިޔަވަޅުތައް އެޅުމަށް، ޣައްޒާއަށްދޭ ހަމަލާތައް ތަހްގީގުކުރި މިނިވަން ކޮމިޝަނުން ގޮވާލާފައި ވެއެވެ.
ޣައްޒާގެ ނަސްލުނައްތާލަން ހުސްނުވާ ވަރަށް ބޮމާއި، މިސައިލާއި، ރޮކެޓާއި، ހަތިޔާރާއި، ޓޭންކާއި، ބުލްޑޯޒަރާއި، އެނޫންވެސް އަލާތްތައް އެންމެ ގިނައިން ފޯރުކޮށްދެމުން ގެންދަނީ އެމެރިކާއާއި، ޖަރުމަނުންނެވެ.
އޭގެ އިތުރުން، ޔޫރަޕްގެ އެތައް ގައުމަކުވެސް ހަތިޔާރު ފޮނުވަމުން ގެންދެއެވެ.
ކިޔުންތެރިންގެ ހިޔާލު