ހެޔޮ ބިންގާ ޖަމްޢިއްޔާ އަދި އިސްލާމީކަންތައްތަކާ ބެހޭ ވުޒާރާ ގުޅިގެން ކުޑަކުދިންނަށް އަމާޒުކޮށް ‘އެހީވާނީ ކާކު؟’ މި މަޢުޟޫއުއަށް ޚާއްސަ ޕްރޮގުރާމެއް ކުރިއަށް ގެންގޮސްފިއެވެ.

މި ޕްރޮގުރާމު ނަންގަވައިދެއްވީ އައްޝައިޚް ޖައުފަރު ފާއިޒްއެވެ. މި ޕްރޮގުރާމުގައި ބޮޑަށް އަލިއަޅުވާލާފައިވަނީ ކުދިންނަށް އެހީތެރިވުމާއި ގުޅޭ ގޮތުންނެވެ. އެގޮތުން މައިންބަފައިންގެ އިތުރުން ކުދިން އެއް ކުއްޖަކު އަނެއް ކުއްޖަކާއި އެހީވާން ޖެހޭނެކަމާއި ކުދިން ހިތްހަމަ ނުޖެހޭ ކަންކަން ކޮށްގެން ނުވާނެކަން ވަނީ ބުނެދެއްވާފައެވެ. މީގެ އިތުރުން ރަސޫލާ ޞައްލަﷲ ޢަލައިހި ވަސައްލަމައާއި ޞަޙާބީންގެ އެހީތެރިކަން ފޯރުވުމުގައި ދެއްކެވި ނަމޫނާއާއި ގުޅޭ ވާހަކަތަކާއި އެހިތެރިވުމަށް ކުދިންނަށް ކުރެވޭނެ ކަންކަންވެސް ކިޔައިދެއްވާފައިވެއެވެ.

މި ޕްރޮގުރާމުގައި ގިނަ އަދަދެއްގެ ކުދިން ބައިވެރިވެފައިވާކަން ފާހަގަކޮށްލެވެއެވެ.