ރައީސް ޑރ. މުހައްމަދު މުއިއްޒަށް މަރުގެ އިންޒާރުދިން މީހާ 10 ދުވަހަށް ބަންދުގައި ބަހައްޓަން ކްރިމިނަލް ކޯޓުން އަމުރުކޮށްފިއެވެ.
އެ މައްސަލައާ ގުޅިގެން ހައްޔަރުކޮށްފައި ވަނީ ތ. ތިމަރަފުށި، މަލަސް، މަސީހު މޫސާއެވެ. ފުލުހުން ބުނީ ކޯޓް އަމުރެއްގެ ދަށުން އޭނާގެ ފޯނު ވެސް ހިފަހައްޓާފައިވާ ކަމަށެވެ.
އޭނާގެ ބަންދާ މެދު ގޮތެއް ނިންމަން މިއަދު ކްރިމިނަލް ކޯޓަށް ހާޒިރުކުރުމުން ވަނީ 10 ދުވަހަށް ބަންދުގައި ބަހައްޓަން އަމުރުކޮށްފައެވެ.
ރައީސް މުއިއްޒަށް މަސީހު މަރުގެ އިންޒާރުދިނީ މަސްތުވާތަކެތި ރާއްޖެ އެތެރެކުރާ މީހުންނާއި އެތަކެތީގެ ވިޔަފާރި ކުރާ މީހުންނަށް މަރުގެ އަދަބު ދިނުމަށް ގާނޫނަށް އިސްލާހު ހުށަހަޅުއްވާނެކަން އެމަނިކުފާނު އިއުލާންކުރެއްވުމުންނެވެ.
އޮންލައިން ނޫހަކު ލިޔެފައިވާ އެ ޚަބަރު ޝެއާކޮށް މަސީހު ފޭސްބުކުގައި ލިޔެފައި ވަނީ “ފުރަތަމަ މަރާލަންވީ” ރައީސް މުއިއްޒު ކަމަށެވެ.
މަސްތުވާތަކެއްޗާ ބެހޭ ގާނޫނަށް ގެންނަ އިސްލާހު ގެނައުމުގެ ކަންކަން ކުރަންވީގޮތުގެ އިރުޝާދު ރައީސް ވަނީ ކަމާބެހޭ އިދާރާތަކަށް ދެއްވާފައެވެ.
ކިޔުންތެރިންގެ ހިޔާލު