އިނގިރޭސިވިލާތުގެ ވޮންޑަރލަސްޓް މެގަޒިން އިން ކުރިއަށް ގެންދާ “ވޮންޑަރލަސްޓް ރީޑަރ ޓްރެވެލް އެވޯޑް”ގެ ދެ ގިންތިއަކުން ރާއްޖެ ނޮމިނޭޓްވެއްޖެއެވެ.
ވޮންޑަރލަސްޓްއަކީ އިނގިރޭސިވިލާތުގެ ދަތުރުވެރިންގެ މެދުގައި މަޤްބޫލު މެގަޒިންއެކެވެ. މި އެވޯޑަކީ ކޮންމެ އަހަރަކުވެސް ދަތުރުފަތުރުގެ ދާއިރާގައި ދޭ މަޤްބޫލު އެވޯޑެކެވެ. މި ފަހަރު ދެ ކެޓަގަރީއަކުން މި އެވޯޑަށް ރާއްޖެވަނީ ނޮމިނޭޓްވެފައެވެ. އެއީ ‘އެންމެ ހިތްއެދޭ ޤައުމު’ އަދި ‘އެންމެ ހިތްއެދޭ ރަށްތައް’ މި ދެ ކެޓަގަރީއެވެ.
މި ދެ ކެޓަގަރީން ރާއްޖެއަށް ވޯޓު ދިނުމުގެ ފުރުސަތު ހުޅުވާލާފައިވާއިރު، ވޯޓު ދިނުން އޮކްޓޯބަރ މަހުގެ 27 ވަނަ ދުވަހުގެ ނިޔަލަށް ކުރިއަށްދާނެއެވެ. އެގޮތުން ވޮންޑަރލަސްޓް ޓްރެވެލް އެވޯޑް ޕޯޓަލް މެދުވެރިކޮށް ފޯމެއް ފުރާލައިގެން ވޯޓުލެވޭނެއެވެ. އަދި ވޯޓުލާ ފަރާތްތަކުން އިންސްޓަގްރާމް ނުވަތަ ފޭސްބުކް މެދުވެރިކޮށް ވޮންޑަރލަސްޓް ފޮލޯކުރަން ޖެހެއެވެ.
މިއަހަރު ވޮންޑަރލަސްޓް މެގަޒިންގެ ޓްރެވެލް އެވޯޑަށް 200،000 އަށްވުރެ ގިނަ މީހުން ވޯޓުލާނެ ކަމަށް ބެލެވޭ ކަމަށް އެ މެގަޒިން އިން ބުނެއެވެ.
މި އެވޯޑް ހަފްލާ އޮންނާނީ މިއަހަރު ފަހުކޮޅު އިނގިރޭސިވިލާތުގައި ބާއްވާ ވޯލްޑް ޓްރެވެލް މާކެޓް ފެއަރ އޮންނަ ދުވަސްވަރާއި ދިމާކޮށެވެ.
ކިޔުންތެރިންގެ ހިޔާލު