ހުޅުމާލޭގައި އިމާރާތްކުރަން ފަށައި ހުއްޓިފައިވާ ކޭ ޕާކް ފްލެޓްތައް މަކަރާއީ ހީލަތުން މީހުންނަށް ވިއްކައި ފައިސާއަށް ޚިޔާނާތްތެރިވި ކަމަށް ތުހުމަތު ކުރެވޭ ހަސަން މަމްދޫހު ބަންދުން ދޫކޮށްލައިފިއެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި މަމްދޫހު ބަންދުން ދޫކޮށްލަން އަމުކުރީ ކޯޓަށް އެއްބާރުލުން ދިނުމަށް ޝަރުތުކޮށެވެ.
ގާޒީ އަލީ ނަދީމް ވިދާޅުވީ ކޯޓަށް އެއްބާރުލުން ނުދޭނަމަ އަލުން ބަންދުކުރާނެ ކަމަށެވެ. އޭނާ މިހާތަނަށް ބަންދުކޮށްފައި ބެހެއްޓީ ހުޅުމާލެ ޖަލުގައެވެ.
ކޭ-ޕާކް ފްލެޓުތައް މަކަރާއި ހީލަތުން ވިއްކި މައްސަލައިގައި ތުހުމަތުވާ އެ ކުންފުނީގެ މައިނޯރިޓީ ހިއްސާދާރުކަންވެސް ކުރާ މަންޑޭގެ މައްޗަށް ޕްރޮސިކިއުޓާ ޖެނެރަލް (ޕީޖީ) އޮފީހުން ވަނީ 100 އަށްވުރެ ގިނަ ދައުވާ އުފުލާފައެވެ.
މަންޑޭ ވަނީ ކޯޓަށް ހާޒިރުނުވާން ވެގެން ބަހަނާތަކެއް ދައްކާފައެވެ. އެގޮތުން އޭނާ ވަނީ ޑޮކްޓަރުގެ ލިޔުންތަކެއް މީގެކުރިން ކޯޓަށް ހުށަހަޅާފައެވެ. އެކަމަކު އޭނާ ބޭރުގައި އުޅޭ ކަމުގެ މަައުލޫމާތު ބައެއް ފަރާތްތަކުން ކޯޓަށް ހުށަހަޅާފައިވާ ކަމަށް ގާޒީ ވިދާޅުވިއެވެ.
ޑޮކްޓަރުގެ ލިޔުންތަކަށް ބަލާއިރު، ކޯޓަށް ހާޒިރުނުވެވޭ ފަދަ ސިއްހީ ކަމެއް އޭނާއަށް ދިމާވެފައިނުވާކަން އެނގޭ ކަމަށް ވެސް ގާޒީ ވިދާޅުވިއެވެ.
ކިޔުންތެރިންގެ ހިޔާލު