ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ނެރުނު އަމުރު ބާތިލުކުރުމަށް ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް ނިންމާލައިފިއެވެ.
ޝަމްއާން ބަންދުކުރަން ކްރިމިނަލް ކޯޓުން ކުރި އަމުރަށް ހައިކޯޓުން ތާއީދުކުރުމުން އޭނާގެ ފަރާތުން އެ މައްސަލަ ސުޕްރީމް ކޯޓަށް ހުށަހެޅުމުން މިއަދު ވަނީ އެ މައްސަލައިގެ އަޑުއެހުންތައް ފަށައިފައެވެ. އަދި ދެ ގަޑިއިރަށްފަހު އަޑުއެހުންތައް ނިންމާލިއެވެ.
މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރީންގެ އަތުން ނާޖާއިޒު މަންފާ ހޯދަމުންދާކަމުގެ ތުހުމަތުގައި ފުލުހުން ޝަމްއާން ހައްޔަރުކޮށްފައިވަނީ މިދިޔަ މާޗު މަހުގެ 22 ވަނަ ދުވަހުގެ ރޭގެ ވަގުތެއްގައެވެ.
ޝަމްއާންގެ ބަންދާ މެދު ގޮތެއް ނިންމުމަށް މާޗު 23 ވަނަ ދުވަހު ކުރިމިނަލް ކޯޓަށް ހާޒިރުކުރުމުން ވަނީ ބަންދަށް 15 ދުވަސް ޖަހައިފައެވެ. އެ މުއްދަތު ހަމަވުމުން ބޭއްވި ބަންދު އަޑުއެހުމުގައި ޝަރީއަތް ނިމެންދެން އޭނާ ބަންދުކުރުމަށް އަމުރުކުރިއެވެ.
ޝަމްއާންގެ ފަރާތުން މިއަދުގެ އަޑުއެހުމުގައި ވެސް ފާހަގަކުރީ ކޮރަޕްޝަންގެ މައްސަލައަކަށްވީ ނަމަވެސް، އެ މައްސަލައިގައި އެންޓި ކޮރަޕްޝަން ކޮމިޝަންގެ ބައިވެރިވުމެއް ނެތުމެވެ. އެއީ ގާނޫނާ ހިލާފު ކަމެއް ކަމަށް ޝަމްއާންގެ ވަކީލުން ފާހަގަކުރިއެވެ.
އެ މައްސަލައިގައި ދެން އޮންނާނީ ހުކުމް އިއްވުމުގެ ޝަރީއަތެވެ.
ކިޔުންތެރިންގެ ހިޔާލު