އިންޓަރޕޯލް އިން އިސްނަގައިގެން ހިންގި “އޮޕަރޭޝަން ސެކިއުރ” ގައި ދިވެހި ފުލުހުންގެ ޚިދުމަތުގެ ސައިބަރ ކްރައިމް ސެންޓަރުން ބައިވެރިވެ، މުހިއްމު މަަސައްކަތްތަކެއް ކޮށްފިއެވެ.
އޮޕަރޭޝަން ކުރިއަށް ގެންގޮސްފައިވަނީ ޖަނަވަރީ މަހުން ފެށިގެން އޭޕްރީލް މަހުގެ ނިޔަލަށެވެ. އެ އޮޕަރޭޝަނުގައި ކުރި މަސައްކަތްތަކާއި ބައެއް މައްސަލަތަކާއި ގުޅުންހުރި އަދާހަމަ ފުލުހުން މިއަދު ވަނީ އާއްމުކޮށްފައެވެ.
އޮޕަރޭޝަނުގެ މައިގަނޑު ބޭނުމަކީ އިންޓަރނެޓް މެދުވެރިކޮށް ހިންގާ ކުށްތަކަށް އަރައިގަންނަ ފަރާތްތަކުގެ އިންފްރާސްޓްރަކްޗަރ ނައްތާލުމެވެ. އޮޕަރޭޝަނުގައި ގިނަ ޤައުމުތަކަކުން އޮފިޝަލުން ވަނީ ބައިވެރިވެފައެވެ. އޮޕަރޭޝަން ހިންގާފައިވަނީ އިންޓަރޕޯލްގެ އޭޝިއާ އެންޑް ސައުތު ޕެސިފިކް ޖޮއިންޓް އޮޕަރޭޝަންސް އަގެއިންސްޓް ސައިބަރކްރައިމް (އޭއެސްޕީޖޭއޯސީ) މެދުވެރިކޮށެވެ.
މި އޮޕަރޭޝަނުގައި ދިވެހި ފުލުހުންގެ ޚިދުމަތުން ކޮށްފައިވާ މަސައްކަތްތަކުގެ ތެރޭގައި، ރިޕޯޓުތައް އެކުލަވާލައި، ކަމާގުޅޭ ހޯދުންތައް އޮޕަރޭޝަންގެ އެހެނިހެން ބައިވެރިންނާ ހިއްސާކުރުން ހިމެނެއެވެ. މީގެ އިތުރުން، ދިވެހިރާއްޖެއާ ގުޅުންހުރި ނުރައްކާތެރި ހަރަކާތްތައް ދެނެގަތުމަށްޓަކައި ބޭނުންވާ މައުލޫމާތު ހޯދާފައިވެއެވެ.
ފުލުހުން ބުނީ އޮޕަރޭޝަނުގައ ރާއްޖެއާ ގުޅުންހުރި މަޢުލޫމާތުތައް އެއްކޮށް ސައިބަރ ކްރައިމް ސެންޓަރުން ތަޙްޤީގުތައް ކުރި ކަމަށެވެ. އަދި، އިންޓަރޕޯލްގެ އިތުރުން އެހެނިހެން އިދާރާތަކާއެކު ގުޅިގެން މަސައްކަތްކޮށް، އިންޓެލިޖެންސް މަޢުލޫމާތުތައް އެއްކޮށް ދިރާސާކޮށްފައިވާކަމަށް ފުލުހުން ބުނެފައިވެއެވެ.
އޮޕަރޭޝަންގައި ކުރި ބައިނަލްއަޤްވާމީ މުހިއްމު ބައެއް މަސައްކަތްތައް؛
އިންފޮމޭޝަން ސްޓީލިންގ މަލްވެއަރއާ ގުޅުންހުރި 20،000 އަށްވުރެ ގިނަ އައިޕީ އެޑްރެސްތަކާއި ޑޮމެއިންތައް ނައްތާލުން.
އެކު ޖުމުލަ 41 ސަރވަރއާއި 100 ގިގަބައިޓަށްވުރެ ގިނަ ޑޭޓާ އަތުލައިގަތުން.
ގާނޫނާ ހިލާފު ސައިބަރ ހަރަކާތްތަކާ ގުޅުންހުރި 32 މީހަކު ހައްޔަރުކުރުން.
އޮޕަރޭޝަނުގައި 216،000 އަށްވުރެ ގިނަ ވިކްޓިމްސް އާއި ވިކްޓިމަކަށް ވެދާނެ ފަރާތްތަކަށް އެކަމުގެ މައުލޫމާތު ދެވި، ރައްކާތެރިވުމުގެ ފިޔަވަޅުތައް އެޅުމަށް އެންގުން.
ދިވެހި ފުލުހުންގެ ޚިދުމަތުގެ ސައިބަރ ކްރައިމް ސެންޓަރުން ބުނީ އޮޕަރޭޝަނުގައި ބައިވެރިވުމަކީ ބައިނަލްއަގުވާމީ ފެންވަރުގައި ސައިބަރ ކުށްތަކާ ދެކޮޅަށް މަސައްކަތްކުރުމަށް ދިވެހި ފުލުހުންގެ ޚިދުމަތުން ދޭ އަހައްމިއްޔަތުގެ ހެއްކެއް ކަމަށެވެ. އެފަދަ އޮޕަރޭޝަންތައް ކޮންމެހެން ބޭނުންވާ ކަމަށާއި، ރާއްޖޭގެ ޑިޖިޓަލް ވެށީގެ ސަލާމަތާއި ރައްކާތެރިކަން އިތުރުކުރުމަށްޓަކައި ސައިބަރ ކްރައިމް ސެންޓަރުގެ ޤާބިލްކަން އިތުރުކުރުމުގެ މަސައްކަތް ކުރަމުންގެންދާ ކަމަށް ސައިބަރ ކްރައިމް ސެންޓަރުން ބުނެފައިވެއެވެ.
ކިޔުންތެރިންގެ ހިޔާލު